Азербайжан  улсад  Үндсэн  хуульд  нэмэлт өөрчлөлт оруулах эсэх асуудлаарх бүх нийтийн санал асуулга болж  байна.  Улс орон даяар 125  тойрогт  иргэд сонгогчдын саналыг авах  хэсэг хороодыг нээн ажиллуулж  байна. Эрх баригчдын  мэдэгдэж  байгаагаар  бүх нийтийн  энэ санал асуулгын гол зорилго нь  төр  засгийг  удирдах  системийг  төгс төгөлдөр  болгоход  чиглэгдэж буй юм байна. Бүх  нийтийн  санал асуулгын үр дүнд улс  орны  удирдах шинэ албан  тушаал бий болгох,  Ерөнхийлөгч  болон  парламентын гишүүнээр  сонгогдоход  насны  хязгаар  тогтоосон байсныг  хүчингүй  болгохоор  төлөвлөж  байгаа юм.

Үндсэн хуульд нийт  29 нэмэлт, өөрчлөлт оруулахаар төлөвлөж байгаа бөгөөд  санал асуулгад оролцогчид  тус бүрт нь  саналаа илэрхийлэх  юм  байна. Энэ тухай  Азербайжаны  сонгуулийн төв хорооны дарга  Мазахир  Панахов  мэдэгдсэн юм.  Бүх нийтийн  санал асуулгад  оролцогчдын  тал  хувь нь  энэхүү нэмэлт өөрчлөлтүүдийг дэмжихээ илэрхийлсэн цагт Үндсэн хуулиа  өөрчлөх  юм байна.  Бүх нийтийн санал  асуулгын явцыг  олон улсын болон  дотоодын  53 мянган   ажиглагч  ажиглаж байна.  Иргэд  сонгогчдод дахин  санал өгөх боломж олгохгүйн тулд  эрхий  хуруунд  нь  өнгөгүй  бэхээр  тэмдэг тавьж буй аж. Мөн санал асуулгын  хуудсаа хийх  хайрцгуудыг шилэн болгосон байна.