Филиппин улсад зика вирусын халдвар авсан 3 тохиолдол шинээр бүртгэгдсэн байна. Энэ тухай тус улсын Эрүүл мэндийн яамнаас  албан  ёсоор мэдээлсэн байна. Ийнхүү шумуулаар халдварладаг гэгддэг тус вирусын халдвар авсан хүний тоо 11-т хүрээд байгаа юм байна. Тэдний нэг нь Себу хотын оршин суугчид 19 долоо хоногтой хөл хүндтэй бүсгүй байгаа аж.

Харин Өмнөд Солонгост 14 хүн энэ вирусын халдвар авсан болох нь батлагдаад байна. Өмнөд Солонгосын эрх баригчид 2015 оны  алдаагаа давтахгүйн тулд  зика вирусын халдвар тархахаас  сэргийлсэн онцгой арга хэмжээнүүдийг авч  байгаагаа мэдэгдэж  байна.  Өнгөрсөн жил  тус улсад Мерсийн халдвар тархсанаас болж 187  хүн  энэ вирсын  халдвар  авч  38 нь нас барж байсан билээ.  Халдварт энэ вирусаас болж Өмнөд Солонгосын  аялал жуулчлалын салбар багагүй хохирол амсч байсан юм.

Азийн орнуудаас мөн Сингапурт  энэ вирусын  халдвар  ихээр  тархаж байгаа юм. Сүүлийн мэдээгээр 350 гаруй хүн зика вирусын халдвар авсан нь батлагдаж байсан ч сүүлийн 7 хоногт шинэ тохиолдол  бүртгэгдээгүй байна. Шумуулаар халдварладаг зика вирус нь анх 1947 онд Угандагийн ойн сармагчнаас илэрч байсан. Түүнээс хойш  5 жилийн дараа Уганда төдийгүй Танзаний  иргэд энэ вирусын халдвар  илэрсэн нь тогтоогдсон.

Өнөөдөр  энэ вирусын халдвар Африк, Өмнөд болон Хойд Африк төдийгүй  Ази, Номхон далайн  орнуудад ч тархаад  байгаа юм. хэдийгээр 70-аад жилийн өмнө ийм вирус байдаг нь тодорхой болж байсан ч энэхүү вирус нь эхийн хэвлийд байгаа ургийн тархины хөгжлийг саатуулж, жижиг толгойтой, улмаар оюуны хомсдолтой болгодог байж магадгүй гэсэн Бразил улсын мэдээллээс болж олон  улс анхаарлаа хандуудах болсон билээ.