Украины  нийслэл  Киев  хотноо  дэлхийн II дайны  үеэр  амь насаа алдсан хүмүүсийн  дурсгалыг  хүндэтгэх  ёслол  боллоо. 1941-1943 оны  хооронд  Нацистуудын  эзлэн  түрэмгийллийн үед  Бабий Яр  гэдэг  газарт еврей, цыган, Зөвлөлтийн  армийн  олзны  цэргүүд,  энгийн иргэд гээд 100 гаруй  мянган  хүнийг буудан  хороосон  байдаг юм.

Тэдний  дурсгалыг хүндэтгэх арга хэмжээнд  оролцохоор  Украины нийслэл  хотод  олон улсын  албан ёсны төлөөлөгчид  хүрэлцэн ирсэн байлаа.  Мөн  энэ  арга хэмжээнд  дэлхийн өнцөг  булан  бүрээс ирсэн мянга  орчим еврей  үндэстэн  оролцсон байна.  Украины  Ерөнхийлөгч Петр Порошенко энд хэлсэн үгэндээ "Бабий Ярт болсон  энэ эмгэнэлт хэрэг  бол бүх хүн төрөлхтний  хувьд  түгшүүрт  дохио  байсан.  Хүний  эрх, эрх  чөлөөг нухчин  дардаг аливаа  дэглэм бол  хүн  төрөлхтний гол аюул  заналхийлэл  юм" гэж онцлон  мэдэгдсэн  байна.

Одоогоос  75  жилийн  өмнө нацистууд  Киев болон  ойролцоох  хотынх нь бүх  еврейчүүдэд  Мельников болон  Доктериевийн гудамжны  буланд  өглөөний  8 цагт цуглахыг  тушаасан  байна. Ингэхдээ  бүгд  бичиг баримт болон үнэт  зүйлс, мөнгө,  дулаан  хувцастайгаа  ир  хэмээн  үүрэг  болгожээ. Харин   цугласан  олныг   Бабий Яр нэртэй газарт  аваачин  буудан  хороосон  байдаг.

1941 оны есдүгээр сарын 29, 30-нд л гэхэд  энд  нийт  еврей үндэстэн  34  мянган хүнийг буудан  хороосон  юм.  Аймшигт  аллага  болсон  энэ газарт  өнөөдөр  Холокостийн  хохирогсод болон  Зөвлөлтийн   цэргүүд,   энгийн иргэдийн  дурсгалд  зориулсан хөшөө  дурсгал  байдаг.