Гадаад харилцааны сайд элчин сайд нарыг хүлээн авч уулзав

Шуурхай:

Гадаад харилцааны сайд элчин сайд нарыг хүлээн авч уулзав

2016-10-04 16:01:58

Монгол Улсын Гадаад харилцааны сайд Ц.Мөнх-Оргил өнгөрсөн даваа гарагт Унгар Улсаас Монгол Улсад суугаа Онц бөгөөд Бүрэн эрхт Элчин сайд Акош Мадариг Төрийн ордонд хүлээн авч уулзав.

Уулзалтын үеэр сайд Ц.Мөнх-Оргил Монгол Улс нь эртний түүхэн холбоотой, уламжлалт найрсаг харилцаатай Унгар Улстай хөгжүүлж буй харилцаандаа өндөр ач холбогдол өгдөг бөгөөд хамтын ажиллагааг шинэ агуулгаар баяжуулж, олон салбарт өргөжүүлэн хөгжүүлэх эрмэлзэлтэй байдгийг тэмдэглээд монгол оюутнуудыг Унгар Улсын Засгийн газрын тэтгэлэгт хамруулж, Унгарын их, дээд сургуулиудад боловсрол эзэмших боломж олгож буйд талархал илэрхийлэв.

Талууд хөдөө аж ахуйн салбар нь манай хоёр орны харилцааны тэргүүний чиглэл болохыг онцлоод, тус салбарт хамтран хэрэгжүүлэх төслийн талаар санал солилцож, харилцан дэмжлэг үзүүлж ажиллахаа илэрхийлэв.

Мөн өдөр Гадаад харилцааны сайд Ц.Мөнх-Оргил Бүгд Найрамдах Азербайжан Улсаас Монгол Улсыг хавсран суугаа Элчин сайд Латиф Гандиловыг эх орондоо бүрмөсөн буцаж байгаатай нь холбогдуулан хүлээн авч уулзав.

Уулзалтын үеэр харилцааны асуудлаар тодорхой санал солилцсоноос гадна далайд гарцгүй хөгжиж буй орнуудын Олон улсын судалгааны төвийн үйл ажиллагаанд Монгол Улс өндөр ач холбогдол өгч байгааг тэмдэглэж, тус төвийг үүсгэн байгуулах тухай олон талт хэлэлцээрт Азербайжан Улсыг ойрын хугацаанд нэгдэнэ гэдэгт найдаж байгаагаа Гадаад харилцааны сайд Ц.Мөнх-Оргил илэрхийлэв.

Тэд хоёр орны Гадаад харилцааны сайд нар харилцан айлчлах, айлчлалын үеэр хоёр талын хооронд байгуулах баримт бичгийн талаар санал солилцов.

Нийтэлсэн: Гадаад харилцааны яам

	Гадаад харилцааны сайд элчин сайд нарыг хүлээн авч уулзав
Үзсэн: 788	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.