Засгийн газраас “Эдийн засгийн хямралыг даван туулах төлөвлөгөө” боловсруулж байгаа тухай Сангийн сайд танилцууллаа. Тодруулбал, Улсын нэгдсэн төсвийн алдагдлыг 2020 он гэхэд тэглэх зорилт тавьжээ. 

Энэ он гарснаас хойш эхний 9 сарын байдлаар манай улсын чанаргүй зээлийн хэмжээ тогтмол өссөн, дипляци үргэлжилсэн, мөн экспорт, импортын хэмжээ өнгөрсөн оны мөн үеэс буурсан үзүүлэлттэй байгааг энэ 7 хоногт Монгол банкнаас танилцуулсан. Долларын ханш өнгөрсөн пүрэв гарагт 2360 байсан бол Баасан гарагт 2380, өнөөдрийн байдлаар 2400-д хүрсэн албаны эх сурвалжийн мэдээлэл байна. Төсвийн орлого хумигдаж байхад зарлага өндөр байгаатай холбогдуулан улсын нэгдсэн төсвийн алдагдал 2 их наяд төгрөг давсан. Эдийн засгийн энэ хүнд байдлаас гарахын тулд Сангийн яам, Монгол банктай хамтран “Эдийн засгийн хямралыг даван туулах төлөвлөгөө” боловсруулжээ.

“Эдийн засгийн хямралыг даван туулах төлөвлөгөө”-г энэ 7 хоногт Үндэсний аюулгүй байдлын зөвлөлөөр хэлэлцсэний дараа УИХ-д өргөн мэдүүлээд байна.