Мөсөн дээрх оюуны спорт кёрлингийн ЕАШТ (европын аварга шалгаруулах тэмцээн) Шотландын Глазго хотноо болж өндөрлөлөө. Энэ сарын 18-ны өдөр эхэлсэн 2016 оны европын аваргын тэмцээнд эрэгтэй, эмэгтэй шилдэг 10 орны баг тамирчид өрсөлдсөн.

Эдгээр 10 баг хоорондоо тус бүр нэг тоглолтыг хийж, хожлоороо тэргүүлсэн эхний 4 баг хагас шигшээд өрсөлдөх дүрэмтэй. Эрэгтэйчүүдээс алдарт Никлас Эдин тэргүүтэй Шведийн хүчирхэг баг 8 хожил 1 хожигдолтой европ тивээс шалгарсан шилдэг 10 багийг тэргүүлж, хасагдах шатанд ОХУ-ын багийг хожсоноор аваргын төлөө тоглохоор болсон. Харин 2, 3-р байрт шалгарсан Норвеги, Швейцарын багуудын тоглолтод Норвегийн баг хожиж, 2016 оны Европын аваргын төлөө өрсөлдөх эрхтэй болсон.

Улмаар шигшээ тоглолтод сүүлийн 2 жил дараалан европын аваргаар тодроод байсан Шведийн баг энэ цаг үеийн шилдэг нь болохоо дахин батлан харуулж, 6:5-н харьцаатай хүчтэй өрсөлдөгчөө хожсоноор энэ оны буурал тивийн аварга багаар тодорлоо. 1975 оноос эхлэн зохиогдсон кёрлингийн ЕАШТ-д Шведийн баг ийнхүү 10 дахиа түрүүлж байна. Тэгвэл өдгөө 31 настай, Шведийн багийн ахлагч, дэлхийн хошой аварга Никлас Эдин 5 дахь удаагаа европын аваргын цомыг өргөж байгаа нь энэ юм. Харин тэмцээний хүрэл медалийг Швейцарийн баг хүртжээ.

Кёрлингийн спортоор дэлхийд ноёрхох буурал тивийн АШТ-д эмэгтэйчүүдээс хэсгийн тоглолтод 4-р байраар шалгарсан ОХУ-ын бүсгүйчүүд хагас шигшээ шатандаа тэмцээний хэсгийн тоглолтод нэг ч хожигдолгүй буюу 9 дараалан хожиж тэргүүн байраар хасагдах шатанд шалгарсан Шотландын багийг хожсоноор аваргын төлөө тоглохоор шалгаран үлдээд байсан. Тэгвэл Шведийн хүчирхэг баг хэсгийн тоглолтоос 2-р байраар хасагдах шатанд шалгарч, 3-р гарсан Чехийн багийг буулган авсанаар шигшээ тоглолтод оролцох эрхээ авсан.

Улмаар шигшээ тоглолтод Шведийн багийн Анна Хасселбөрг сүүлийн чулуугаар хожлын оноо авах боломжтой байсан ч энэхүү оролдлого нь амжилтгүй болсоноор ОХУ-ын баг өрсөлдөгчөө 6:4-н харьцаатай ялсан юм. Ийнхүү ОХУ-ын эмэгтэйчүүдийн шигшээ баг сүүлийн 2 жил дараалан аваргын алтан медалийг хүртэж, кёрлингийн европ тивийн хошой аварга болж байна. Мөн тэд тэмцээний түүхэн дэх 4 дэх аваргын цомыг нь ОХУ-д авчирсан юм. Харин тэмцээний 19 удаагийн аварга, Кёрлингийн спортод ноёрхлоо тоглтоогоод буй шведийн шилдэг баг 11 дэх мөнгө медалиа хүртсэн бол эмэгтэйчүүдийн хүрэл медалийг хүчирхэг Шотландын баг хүртжээ.