Дэлхийн оюутан залуучуудын зуны 29-р Универсиад наадам Хятадын Тайваньд эхлэхэд 16 хоногийн хугацаа үлдээд байна. Энэ удаагийн "Бага олимп"-д монгол улс спортын 9 төрлөөр 76 хүний бүрэлдэхүүнтэйгээр оролцох юм. МОСХ-ны удирдлагууд хүндийн өргөлтийн төрлөөр энэ зуны Универсиад наадамд оролцох тамирчдын бэлтгэлийн явцтай танилцаж, арвин амжилт гаргахыг хүсэн ерөөлөө.

СТО-д байрлах МХӨХ-ны бэлтгэлийн танхимд үндэсний шигшээ багийн дасгалжуулагч Ц.Хосбаярын удирдлага дор зуны 29-р универсиад наадамд оролцох тамирчид бэлтгэл сургуулилтаа чамбайруулан базааж байна. Мөн үндэсний шигшээ багийн 30 орчим тамирчин хамтарсан бэлтгэлээ энэ үеэр үргэлжлүүлж байсан юм. Универсиад наадмын хүндийн өргөлтийн төрлийн эмэгтэйчүүдийн 69 кг-ийн жинд “Сити” дээд сургууль, “Алдар” спорт хорооны тамирчин, ОУХМ Отгонтуяа өрсөлдөх бол ҮБТДС, “Аврагч” спорт хорооны тамирчин Г.Анужин 63 кг-ийн жинд хүч сорьно. ОУХМ Г.Ануужин өнгөрсөн 7-р сард залуучуудын Ази тивийн АШТ-ээс мөнгөн медаль хүртээд байгаа юм.

Универсиад наадамд хүндийн өргөлтийн төрлөөр оролцох 3 дахь тамирчин бол ИЗИС, “Алдар” спорт хорооны тамирчин ОУХМ Баярцэцэг юм. Түүний хувьд өмнө нь 2013 оны Казанийн Универсиад наадамд оролцож байсан туршлагатай.

Энэ удаагийн Универсиад наадамд медаль хүртэх боломжтой гол спортын төрлүүдийн нэг хүндийн өргөлтийн тамирчид маргаашнаас эхлэн Төр хурахад байрлах бэлтгэлийн баазад гарч, бэлтгэлээ цаашид үргэлжлүүлэн хийнэ. Улмаар энэ сарын 12-нд бэлтгэлээсээ бууж, дасгалжуулагчийнхаа хамтаар 4 хүний бүрэлдэхүүнтэйгээр Тайвань улсыг зорих юм.

Зуны "Универсиад 2017" наадмын хүндийн өргөлтийн тэмцээн нь Шинэ Тайпэй хотын Тамсу дүүргийн Тамкан их сургуулийн “Шаомо спортын ордон”-ны 7 давхарт зохиогдоно. Үзэгчдийн суудлын тоо нь 1287. Энэхүү спортын ордон нь тамирчдын тосгоноос 33,5 км-т баруун хойш зүгт оршдог юм. 
Хүндийн өргөлтийн тамирчидын тэмцээний өмнөх бэлтгэл нь Тамкан их сургуулийн “Шаомо спортын ордон”-ны 4 давхарт болно. 
Эрэгтэйчүүд: 56кг, 62кг, 69кг, 77кг, 85кг, 94кг, 105кг, +105 кг жингээр болно. 
Эмэгтэйчүүд: 48 кг, 53кг, 58кг, 63кг, 69кг, 75кг, 90кг, +90 кг жингээр явагдана. 
Техникийн зөвлөгөөн 8 сарын 19-нд 11:00 цагаас Тамкан их сургуулийн “Шаомо спортын ордон”-ны 7 давхарт болно.