Хоёрдугаар сарын 9-ний энэ өдөр Монголын түүхэнд ямар онцлох үйл явдал болж байсныг цөөн мөрөөр хүргэе.

-1912 оны хоёрдугаар сарын 9-ний энэ өдөр  "Их хүрээ" гэж нэрлэж байсан өнөөгийн Улаанбаатар хотыг Богд хааны зарлигаар "Нийслэл хүрээ" болгон өөрчилжээ.

-1923 оны энэ өдөр Хошуу ноёны тавьсан өрийг тухайн хошууны ард олон хамтран төлдөг байсан урьдын бурангуй ёсыг Ардын Засгийн Газрын 63 дугаар хурлаас  гаргасан тогтоолоор устгасан байна.

-1933  оны хоёрдугаар сарын 9-ний энэ өдөр манай улс,  Зөвлөлт Социалист Бүгд Найрамдах холбоот улсын хооронд “Радио дэлгэрүүлж байгуулах тухай” 9 зүйл бүхий гэрээ байгуулжээ. Гэрээний дагуу 1934 оны наймдугаар сард ЗХУ-ын тусламжтайгаар суурилуулсан радио станцуудыг манай улсын Засгийн газарт хүлээлгэн өгчээ. Ингээд тухайн оны есдүгээр сарын 1-нд улс даяар радио өргөн нэвтрүүлэг албан ёсоор эхэлсэн юм.  

-1962 оны хоёрдугаар сарын 9-ний энэ өдөр Монгол Улсын Иргэний хуулийг батлан гаргажээ. Уг хуулиар иргэний эд хөрөнгөтэй холбоотой, түүнчлэн эд хөрөнгийн бус амины бусад харилцааг зохицуулахаар болжээ.