Сахалт хатагтай хэмээгдэж түүхэнд мөнхөрсөн Жозефин Клофулия (1827 - 1875) Швейцарит төржээ. Хүмүүсийн ам дамжсан яриагаар 8 настайд нь түүний сахал 5 см байсан бөгөөд сүүлд хэмжихэд 15 см болсон байсан гэдэг. Түүнийг эмэгтэй биш эрэгтэй гэж үзэж шүүхэд өгч байсан тохиолдол гарч байсан ба тэрээр Парист байхдаа зураач Фочүнь Клофулиятай гэр бүл болж байжээ. Хоёр хүүхэд төрүүлсэн ч охин нь нас барж, харин хүү нь түүнийг дуурайсан үсэрхэг төрж байсан юм байна. Женевийн сахалт хатагтай Наполеон III үед ихээхэн алдаршиж байсан бөгөөд тэрээр Наполеоныг элэглэснийхээ хариуд эрдэнийн чулуу авч байжээ.

 

Жозефин Миртл Корбин гэх дөрвөн хөлтэй энэ эмэгтэй 1868 - 1928 онд амьдарч байжээ. Тэрээр салтаан хэсэг дэх хоёр жижиг хөлөөрөө явах чадвартай байсан бөгөөд эдгээр хөл нь харьцангуй хүч султай юм. Жозефин 19 настайдаа эмч Клинтон Бикнелтэй гэр бүл болж дөрвөн охин, нэг хүүгийн эх болжээ.

 

XX зууны эхэн үеийн дэлхийн хамгийн царай муутай эмэгтэй гэгдэж байсан тэрээр 1874 - 1933 онд Англид амьдарч байжээ. Түүнийг Мэри Энн Беван гэдэг бөгөөд 32 настайгаасаа “Acromegaly” эмгэгээр шаналж эхэлсэн байна. Энэ нь хүний биеийн яснууд томрох эмгэг юм. Мэри Томас Бевантай гэр бүл болж дөрвөн хүүхэд төрүүлжээ. 1914 онд нөхөр нь нас барснаас хойш тэрээр амьдралаа авч явахын тулд ажил хийж эхэлсэн бөгөөд гол төлөв аймшгийн шоунд оролцох, циркийн үзүүлбэрт тоглодог байсан гэнэ. Түүнийг нас барахад хийсэн хэмжилтээр Мэри 76 кг жинтэй, 170 см өндөр байсныг тогтоожээ.

 

Түүнийг Мадемозель Габриэл гэдэг. 1900-гаад оноос “The Half Woman” үзүүлбэрийг үзүүлж эхэлсэн тэрээр 1884 онд Швейцарит төржээ. Энэхүү үзүүлбэр нь олны сонирхлыг багагүй татаж байсан ба Америк орноор аялж олны танил болсон байна. Габриэл хэзээ ч ийм төрсөндөө шаналж байгаагүй сэтгэлийн асар их тэвчээр хатуужилтай үзэсгэлэн төгс, ухаалаг нэгэн байсныг түүхчид онцолдог. Тэрээр гурван ч удаа гэрлэж байжээ.