- Өдөр өдрөөр дордсоор байгаа. Одоо зөвхөн өвчин намдаах тариагаар л өдөр хоногийг өнгөрүүлж байна. Юм идэж чадахгүй зовиурладаг. Хэл яриа нь муудаж, бэрхшээлтэй болж эхэлсэн. Өөрөө явж чадахаа болилоо. Мөн баруун, зүүн хоёр гарынх нь эрхий хуруу хоёулаа үхжиж эхэлсэн тул тайруулсан. Мөн хэлний нь зарим үхэжсэн хэсгийг тайраад байна.

 

- Үгүй. Хоёр ойтой байхад нь алдаж унагаад, нугаснаас нь цус  авахуулж байсан. Өөр ямар нэгэн байдлаар өвдөж байгаагүй. Миний охин орон даяар товлолын дагуу явагдсан сахуугийн вакцинд өнгөрсөн 10 сарын 8-ны өдөр хамрагдсан. Тэр цагаас хойш тасралтгүй өвдсөөр одоо биеийн байдал нь бүр дор орчихоод байна.

 

- Вакцин хийсний дараа ямар шинж тэмдэг илэрсэн бэ?

- Вакциныг Баянхонгор аймгийн VI сургуулийн сургуулийн эмч н.Дуламсүрэнгийн хяналтан дор өрхийн эмнэлгийн сувилагч н.Даваа хийсэн юм билээ. Вакцин хийлгэх үед миний охины гар маш их өвдсөн тул эмчид хэлэхэд тоогоогүй гэсэн. Орой гэртээ ирэхдээ гар өвдөөд байна гэж уйлсаар ирсэн. Гарыг нь үзтэл вакцин хийлгэсэн хэсгээрээ улайсан байсан. Өглөө нь “хэл ам бадайраад дотор муухайраад байна” гээд унд цайгаа ч ууж чадахгүй байсан ч бид охиноо гайгүй болчих байх гэж найдаж харзнаад эмчид үзүүлэлгүй хоёр хоног алдсан юм. Залгаад хагас бүтэн сайн өдөр таарсан тул дөрөв хоногийн дараа эмнэлэгт хандсан.

 

- Тэгээд?

-  Дөрөв хоногийн хооронд вакцин хийлгэсэн гарынх нь булчин тэр аяараа хавдаж, хүрэнтээд нил бэрсүү үүсч, хэл нь бамбайж, хүрэнтсэн. Даваа гарагт өрхийн эмнэлэг дээр охиноо аваад очиход өрхийн эмч гарт нь натриар жин тавьж, нэг эм өгөөд, амыг нь зайлж өгөөд явуулсан. Гэтэл тэр шөнөдөө гар нь улам хавдаж, хэл нь бүр их хүрэнтсэн.

Маргааш өглөө эрт Хүүхдийн эмнэлэг дээр очиход “Вакцин хариуцсан мэргэжилтэн Цэрэнхандтай уулз” гэсний дагуу тэр хүнтэй уулзсан.  Гэтэл шууд л тэр хүн “Вакцинаас болоогүй, вакцин найдвартай” гээд халгаагаагүй.

 

- Тэгэхээр анхнаасаа вакцины харшил гэдгийг нь өрхийн эмнэлэг, вакцин хариуцсан мэргэжилтнүүд хүлээн зөвшөөрөхөөс татгалзсан гэсэн үг үү?

- Тийм ээ. Вакцин хариуцсан мэргэжилтэн н.Цэрэнханд  охинд минь үзлэг шинжилгээ ч хийгээгүй байж  “Танай хүүхэд л суурь өвчтэй, гар дээрээ үүтэй, жин багатай, сахуу татрантай...” гэх мэтээр ёс бус аашилж, чих хамар хоолойн эмчид үзүүл гэж өөрөөсөө түлхсэн.

 

- Тэгээд вакцины харшил гэдгийг нь хэн тогтоосон хэрэг вэ?

-  Эмч нар анхнаасаа охиныг минь хараад л вакцины харшил гэдгийг нь мэдэж байсан хэрнээ хариуцлагаас мултрах гээд хэлээгүй. Харин чих, хамар, хоолойн эмч охинд минь тариа хийгээгүй тулдаа оношоо зоригтой хэлсэн хэрэг л дээ. Үзэнгүүтээ “Вакцины харшил болсон байна” гээд харшлын эм бичиж өгсөн. Гэтэл эмийг нь уусан  охины бие бүр дордсон. Аргаа бараад хүүхдийн эмчид үзүүлэхэд мөн л “Вакцинаас болжээ” гээд хэвтүүлж эмчлэхээр болсон.

 

- Эмнэлэгт хэвтсэн хойно нь  н.Цэрэнханд  мөн л вакцинаас хамааралгүй гэж зүтгэсээр байсан уу?

- Тийм ээ. Миний охиныг  эмнэлэгт хэвтэж байхад вакцин хариуцсан мэргэжилтэн н.Цэрэнханд  өөрийгөө хамгаалахын тулд бидэнд хавчлага үзүүлж, “Манай вакцинаас ийм зүйл болох ёсгүй. Энэ хүүхдийг энд биш халдвартын эмнэлэгт хэвтүүлэхгүй юм уу. Танай хүүхэд л сахуу татрантай” гэх мэтээр дарамталж байсан. Энэ хооронд охины бие улам дордсоор байсан тул сургуулийнх нь эмч н.Дуламсүрэн, Өрхийн эмнэлгийн сувилагч Даваа нарыг дуудан ирж харуулаад чухам хэн нь тариа хийснийг асуусан юм. Даваа гэдэг сувилагч вакцин хийсэн гэдгээ хэлсэн. Вакцин хийхээс өмнө хүүхдэд үзлэг хийсэн эсэхийг асуухад сургуулийнх нь эмч “Би үзэх шаардлага байхгүй. Өрхийн сувилагч өмнө нь үзлэг хийсэн байх. Надад ёстой хамаагүй” гээд бас л бултсан. Ингээд эцэст нь хариуцах хүнгүй үлдэж, аймгийнхаа эмнэлэгт гурав хоног эмчлүүлсний дараа хотод ирж, ЭХЭМҮТ-д хэвтсээр өдийг хүрч байна.

 

- ЭХЭМҮТ-ийн тавьсан оношийн дагуух эмчилгээ хэр үр дүнтэй байна?

- ЭХЭМҮТ-д “Вакцины маш хүнд хэлбэрийн харшил буюу урвал” гэсэн оноштойгоор эмчилгээ хийлгэж эхлээд багагүй хугацаа өнгөрлөө.  Гар хөл, хэлнийх нь үхэжсэн хэсгүүдийг тайруулсан ч дахиад л үхжсээр байна. Эмнэлгийн даргатай нь хоёр хоногийн өмнө уулзсан. Ер нь бол бидний зүгээс авах ёстой арга хэмжээгээ авчихлаа. Найдваргүй талдаа шүү гэж байна лээ. Охинд маань хүчтэй тариа хийх ямар ч боломжгүй, бүдүүн судасны хагарал үүсэх эрсдэлтэй байгаа тул зөвхөн өвчин намдаах тариа л хэрэглэж байна.

 

- Та хотод ирээд нэлээдгүй удаж байна. Энэ асудлаар хэвлэл мэдээллийнхэнд арай эрт хандахгүй дээ?

- ЭХЭМҮТ-ийн эмч нар эхлээд хүүхдээ эрүүл саруул болго гэж бидэнд хэлсэн. Эмчилгээ хийж эхэлэхэд эхний хэд хоног овоо дээрдсэн тул сайжирчих юм болов уу гэж итгэсээр өдийг хүрлээ. Гэтэл биеийнх нь байдал бүр дордсон хойно ингэж өөрсдөөсөө түлхэж байгаад үнэхээр гомдолтой байна.

 

- Тийм ээ. Гэхдээ тэр Г.Сүрэнханд гэгч эмч тань миний охиныг огт үзээгүй байж хэвлэлээр яриа өгсөн. Түүгээр зогсохгүй “Вакцинаас болоогүй суурь өвчтэй хүүхэд байсан. Н.Энхбилэг охин төрөхдөө л дутуу төрсөн юм билээ. Вакциныг дандаа хоцорч хийлгэдэг байсан.” гэх мэтээр ярьж биднийг маш их эмзэглүүлсэн. Тэгээд ч нэг хурлаар  вацкин хийсэн эмчийн буруу биш, саяд нэг тохиолддог өвчин гэсэн онош гаргаад ирдэг нь үнэхээр хачирхалтай. Эрүүл мэндийн салбарынхан өөрсдийн хариуцлагагүй үйл ажиллагаагаа өвчтөн лүүгээ чихсээр өдийг хүрсний бодит жишээ, хохирогч нь манай охин болчихоод байна.

 

-Та гэр бүлийн хүнтэйгээ хүүхдээ харж байгаа юу?

-Тийм ээ. Эмнэлэгт ойрхон түрээсийн байрнаас хоол цайгаа зөөгөөд, эдийн засгийн хувьд маш хүнд нөхцөлд охиноо амьдруулчих юмсан гээд зүтгэж байна.

 

- Та хэвлэл мэдээллийн хэрэгслүүдээр дамжуулж төрийн гурван өндөрлөгтөө хандаж байгаа хэрэг үү?

- Охин минь ямар ч эмчилгээ авахгүй, эрүүл мэнд нь дээрдэхгүй, өдрөөс өдөрт дордож, амь нас нь дээсэн дөрөөн дээр ирээд байгаа тул Монгол Улсын Төрийн тэргүүн болон хууль тогтоох, гүйцэтгэх засаглалын тэргүүнүүд болон, салбар хариуцсан сайд та бүхэн анхааран үзэж, бидэнд тусалж, охиныг минь эмчлэх боломжтой газар нь эмчлүүлж, аврахад туслаач хэмээн хичээнгүйлэн хүсч байна.

 

Орон нутгаас нийслэлд ирж, олон сар эмнэлэгт охиноо сахиж буй ядарсан эцэг, эх бид хоёрт хариуцлага алдсан эмч нартай хэл ам, хэрүүл зарга хийж явах чадал, боломж үнэхээр алга. Тиймийн тул Та бүхнийг Монгол Улсынхаа иргэний төлөө чин сэтгэл гарган тусалана хэмээн гүнээ итгэж, ийн хандаж байгаагаа хэлмээр байна.

- Шинэ жилийн өмнө С.Удвал сайд ЭХЭМҮТ-ийн ажилтай танилцсан. Тэр үеэр манай охиныг эргэнэ гэж хэлүүлсэн байсан юм. Бид өрөөгөө янзалчихаад хүлээгээд л байлаа. Гэтэл намайг биз засах гээд гараад ирэхэд манай доод давхраас өгсөөд шууд дээд давхар луу гараад явчихсан. Үдээс хойш эмч орж ирээд “С.Удвал сайд танай охиныг эргэх төлөвлөгөөтэй байсан ч оны эцэс гээд тайлан тооцооны ажил ихтэй байгаа тул нэгдүгээр сард ирнэ гэж хэлүүллээ” гэсэн. Бид уг нь сайдтай уулзаж, бодит байдлаа ярина, дэмжлэг авна гэж их л найдаж байсан юм.