Алтан гагнуур өвс болоод бэлдмэлүүд хүний оюуны болон биеийн хүчний ажиллах чадварыг сайжруулдаг. Эмнэлгийн практикт түүний үндсээр бэлдсэн спиртэн хандыг мэдрэлийн ядаргаа, ажиллах чадвар буурах, мэдрэлийн системийн үйл ажиллагааны өөрчлөлтийн үед хэрэглэнэ. Монголын уламжлалт анагаах ухаанд уушигны сүрьеэ, ясны хугарал, арьсны өвчин, халуун бууруулах, биеийн ерөнхий байдлыг сайжруулахад хэрэглэдэг. Алтан гагнуур нь бор хайрсаар хучигдсан үндэслэг махлаг бүдүүвтэр иштэй. 15 -30 см өндөр ургадаг олон наст өвслөг ургамал. Түүний шүдлэг захтай, уртавтар зууван юлдэн хэлбэрийн махлаг навчис нь ишнээсээ цуварч ургасан байна. Навч иш нь гадуураа бүдэг хөхөвтөр лаван өнгөртэй. Ногоовтор шаргал цэцгүүд нь ишний оройд бөөгнөрч бамбай баг цэцэг үүсгэдэг. Гадагшаа эргэн махийсан хавтага үр жимстэй.