Монголын Үндэсний Супер Лигийн "Бүх одод-2014"-тоглолтын хэвлэлийн хурал  үндэсний мэдээллийн төвд боллоо. Хуралд сагсан бөмбөгийн үндэсний шигшээ баг, Америк Легионеруудын төлөөлөл, тэмцээнд оролцох бусад тамирчид ирж  мэдээлэл хийлээ. “БҮХ ОДОД-2014” энэ сарын 25, 26-ны Бямба, Ням гарагуудад Буянт-Ухаа цогцолборт болох ба тоглолтын эхний өдөр Монголын шигшээ баг, АНУ-ын легионеруудын багтай халз тоглох бол дараагийн өдөр супер лигийн долоон багийн шилдэг 30 тоглогчийг багтаасан бүх оддын тоглолт болох аж. Мөн тоглолтын дундуур 3 онооны шидэлтийн тэмцээн, ур чадварын тэмцээн, слэм данк буюу цагираган дээрээс довтлох үзүүлбэр, багийн эзэд, эрэгтэй, эмэгтэй тоглогчдоос бүрдсэн багийн шидэлтийн тэмцээн, урлаг соёлын шоу үзүүлбэрүүд болох ажээ.