Орхон аймгийн Жаргалант сумын төвөөс зүүн урагш 8 км зайд Намаржаагийн гозгор гэдэг толгойгоос баруун урагш 2-3 км газарт жалганы аманд байдаг бөөрөнхий чулууны зургийг та бүхэн харж байна. 

Нутгийнхан тэр чулууг “Бөөрөнхий сайр” хэмээдэг аж. Цайвар шаргалдуу өнгөтэй, 3.8 м өндөр, 5 м урт өндөг шиг хэлбэртэй боржин чулуун хад юм. Хоёр талаас нь харахад ямар ч өөгүй "аварга өндөг" мэт харагддаг. 

Ил биш хонхор жалга маягийн газарт байдаг тул алсаас харагддаггүй байна. Орчин тойронд нь өөр ямар ч хад чулуу байдаггүй нь сонин бөгөөд хэрхэн яаж энэ газарт бий болж тогтсон нь сонирхол татдаг.