- Манай “Арвин шар зам” хоршоо Эрдэнэт-Улаанбаатарын чиглэлд микро автобусаар тээврийн үйлчилгээ эрхэлдэг байсан.  Бид  өнгөрсөн онд Зам тээврийн яамны зүгээс хот хооронд том оврын автобусаар үйлчлэх шаардлага тавьсны дагуу найман автобус авсан юм. Орон нутагт ажлын байр бий болгох зорилгоор бид уг чиглэлд тээврийн үйлчилгээ үзүүлж байгаа компаниудыг  нийслэлтэй  50/50 хувиар хувааж эзэмшин, цагийн хуваарийн тойргийн дагуу тээвэр хийх хүсэлтээ холбогдох албаныханд уламжилсан. Авто тээврийн үндэсний төвөөс бидний хүсэлтийг судалж үзээд 08:00- 19:00 цагт тээврийн үйлчилгээ явуулах боломж байгааг Зам тээврийн яаманд мэдэгдсэн байдаг.

 

- Зам тээврийн яамны зүгээс Авто тээврийн үндэсний төвийн гаргасан хүсэлтийг зөвшөөрч, гэрээ хийсэн гэж мэдэгдээд байгаа?

 

- Хэвлэл мэдээллийн хэрэгслүүдээр яамны удирдлагууд тэгж яриад байгаа ч бидэнд тээвэр хийх ямар ч эрх олгоогүй, гэрээ хийгдээгүй.  Өөрөөр хэлбэл, манай тээвэрчдийн  65 сая төгрөгийн лизингээр авсан автобуснууд одоогоор ямар нэгэн байдлаар тээврийн үйлчилгээ үзүүлж чадахгүйд хүрч, сард 0.5-1.5 сая төгрөгийн хүү төлөөд зогсож байна.

 

- Танай хоршооны зүгээс тухайлан олгох боломжтой гэсэн цагуудад тээвэр хийхээс татгалзсан юм биш үү?

 

- Татгалзахаас ч аргагүй тээврийн үйлчилгээ явуулахад тохиромжгүй цагууд шүү дээ. Өглөө 08:00 цагт 45 хүний суудалтай автобус зөвшөөрөгдсөн хугацаандаа зорчигчоор дүүрнэ гэж байхгүй. 19:00 цагийн хувьд өөрөө шөнийн тээврийн цагт хориглогдсон цагт багтдаг.

 

- Тэгэхээр Авто тээврийн үндэсний төвийн гаргасан боломжит цагуудын мэдэгдэл хууль зөрчсөн байх нь ээ. Үүнийг танай хоршоод болон холбогдох төрийн байгууллагууд анхнаасаа анзаараагүй хэрэг үү?

 

- Манай хоршоо уг мэдэгдлийг үзэнгүүтээ “Энэ чинь өөрөө хууль зөрчсөн байна. Шөнийн тээврийн цагт багтсан 19:00 цагт бид тээвэр хийх боломжгүй” гэдгээ илэрхийлж байсан.  

 

- Танай хоршоо хичнээн ажилтантай бэ?  

 

- Нийт  60 орчим  жолоочтой. Энэ хүмүүсийн ард 350-400 хүн яамны буруугаас болж  хоногийн хоолгүй болоход хүрээд байна.

 

- Өлсгөлөнд хэдэн хүн оролцож байна вэ?

 

- Нийслэлд өлсгөлөнд оролцохоор 24 жолооч ирээд байгаа. Өчигдөр 10 хүний бүрэлдэхүүнтэйгээр өлсгөлөнгөө эхлүүлсэн байгаа. Өнөөдөр нэмж найман  хүн өлсгөлөнд оролцох хүсэлт, өргөдлөө бичсэн. Цаашид асуудал шийдэгдэхгүй даамжирвал,  50 жолоочийн бүрэлдэхүүнтэйгээр өлсгөлөнгөө үргэлжлүүлнэ.

 

- Өлсгөлөн зарлаад нэг хоночихлоо. Одоогоор өлсгөлөнд оролцож байгаа тээвэрчдийн биеийн байдал ямар байна?  

 

- Тээвэрчдийн биеийн байдал хэвийн байгаа. “Бид өлсгөлөн зарлаж байгаа тул эрүүл мэндийн хяналт тавьж өгнө үү” гэсэн хүсэлтээ Сүхбаатар дүүргийн Эрүүл мэндийн нэгдэлд өлсгөлөн зарлахаасаа өмнө албан бичгээр хүргүүлсэн. Өнөө өглөө бид утсаар лавлахад “Танай асуудлаар хуралдаж байна. Шийдвэр гартал эмнэлгийн тусламжийг түргэн дуудах хэлбэрээр авна уу” гэсэн хариуг тус нэгдлийн дарга нь өгсөн. Гэхдээ одоогоор ямар нэгэн байдлаар түргэн дуудах нөхцөл байдал үүсээгүй.

 

- Та бүхэн өлсгөлөн зарлах зөвшөөрлөө албан ёсоор авсан уу?

 

- Бид холбогдох байгууллагуудад өлсгөлөн зарлана гэдгээ мэдэгдсэн. Тэгээд л үндсэн хуулиар олгогдсон эрхийнхээ дагуу өлсгөлөнгөө өчигдөр эхлүүлсэн.  

 

- Тэгэхээр асуудлыг шийдэгдтэл өлсгөлөнгөө зогсоохгүй гэсэн үг үү?

 

- Асуудлаа эцэслэн шийдэгдтэл өлсгөлөнгөө зогсоохгүй. Ямар нэгэн байдлаар хоног хугацаа засан хууран мэхлэлтэд өртөхгүй гэсэн хатуу байр суурьтай байна. Бүтэн жил гаруй хугацаанд бид хүлээсэн. Одоо бол чадахгүй. Тээвэрчид аргаа барсандаа л тэмцлийн ийм хэлбэрийг сонгосон.

 

- Яамны зүгээс энэ асуудлыг хянаж үзээд, шийдвэрээ эргэж харах хэрэгтэй байна гэж тодорхой хугацаа өгөхийг та бүхнээс хүссэн талаар мэдээлсэн. Олон хүний эрүүл мэнд, амь насаар дэнчин тавиад буй энэ өлсгөлөнг хойшлуулах,  уг шийдвэрийг хүлээх талаар бодож үзсэн үү?  

 

- Биднийг өнгөрсөн оны арваннэгдүгээр сард яамны дэд сайд хүлээн авч уулзаад, 20 хоногийн хугацаа өгнө үү гэсэн хүсэлт тавьсан. Түүнийгээ л ярьж байгаа болов уу.

 

-Тэгвэл өлсгөлөн зарласнаас хойш яамны зүгээс ямар нэгэн тайлбар та бүхэнд хийсэн үү?

 

- Үгүй. Яамныхан тээвэрчид биднийг  хүн гэж тоож үзэхгүй, зугтсаар байгаа. Энэ асуудлаар ажлын хэсэг байгуулагдсан гэсэн.

 

- Зугтсаар байгаа гэхээр ажилдаа ирэхгүй байгаа гэсэн үг үү?

 

- Яамны удирдах ажилтнууд биднийг өлсгөлөн зарласнаас хойш урд хаалгаараа орж гарахаа больж, арын хаалгаараа тусгай шат тавиулан түүгээрээ хөлхөлдөх болсон.

 

- Өлсгөлөн зарлаж тэмцлийн хурц хэлбэрт шилжитлээ та бүхэн яг юуг шийдүүлэхийг хүсч байна вэ?

- Би дээр хэлсэн. Үйлчлүүлэгсдийн тоо их байдаг бусад цагуудыг тээврийн үйлчилгээ эрхлэгчидтэй хамтран эзэмшиж, цагийн хуваарийн тойрог хэлбэрээр үйл ажиллагаагаа хэвийн явуулахыг л хүсч байна даа. Ингэснээр манай зогсож байгаа автобусууд яамдын ажилтнуудын буруугаас үйдэлтэй алдангаа нөхөж, тээвэрчид ар гэрээ авч явах боломжтой болно.

 

 

 

-    “Арвин шар зам”, “Дорнын саруул зам” хоршооныхон яамны үүдэнд өлсгөлөн зарлаад нэг хонож байна. Тэдний тавьж байгаа шаардлагад яамны зүгээс өмнө нь хоёр ч удаа дүгнэлт гаргаж, хариу өгсөн байгаа.

Өмнө нь, энэ асуудлаар тус хоршооныхон яаманд хэд хэдэн удаа хүсэлт ирүүлж байсан. Яаманд ажлын хэсэг байгуулагдан ажиллаж, дүгнэлт гарган тухай бүрт нь хариуг нь өгч байлаа. Энэ удаа ажлын хэсэг байгуулагдсан зүйл байхгүй. Яамнаас зохих хариу тайлбар өгч, хүсэлтийг нь харгалзаж, шугамд цаг гаргаж өгсөн.

 

 

- Зөвшөөрөл олгосон. Тус хоршооныхон өөрсдөө хүлээж аваагүй. 2013 оны 12 дугаар сарын 2-ны өдрийн 9/6971 тоотоор “Арвин шар зам” хоршооны дарга Б.Баяраад энэ тухайгаа мэдэгдсэн. Өөрөөр хэлбэл, “Авто тээврийн үндэсний төв” ААТТӨҮГ-аас дээрх чиглэлийн зорчигч урсгалын судалгааг үндэслэн мөн тус чиглэлд хот хоорондын зорчигч тээврийн үйлчилгээг том оврын автобусаар үйлчилгээ эрхэлж байгаа аж ахуйн нэгж, байгууллагуудын үйлчилгээний давтамжийг багасгахгүйгээр цагийн хуваарьт өөрчлөлт оруулан, үйлчилгээ эрхлэгчдийн эрх ашгийг хөндөхгүйгээр тус хоршоонд долоо хоног бүрийн пүрэв, баасан, бямба, ням гарагт 08:30, 19:00 цагуудад том оврын автобусаар үйлчилгээ гүйцэтгэх боломжтой гэдэг саналыг дээрх тоотоор мэдэгдсэн. Энэ саналыг тус хоршооныхон хүлээж авахгүй байгаа юм.

 

- Манай яам болон Автотээврийн үндэсний төвөөс дээрх боломжуудыг санал болгосон. Бид зорчигч тээврийн үйлчилгээг мөнгө олох хэрэгсэл гэдэг талаас нь биш хүнд үйлчлэх гэдэг талаас нь харж асуудлыг шийдэх ёстой. Бусад аж ахуйн нэгжүүдийн цагаас хулгайлж, нэгэнд нь өгдөг байж таарахгүй. Гэрээ контрактаар хүлээсэн үүрэг, хариуцлага гэж байна.   

 

- Дархан, Эрдэнэт-Улаанбаатарын чиглэлд зорчигч тээвэрлэдэг олон компани бий. Бүгд л зорчигч урсгал ихтэй цагуудад тээврийн үйлчилгээнд явахыг бодно. Нэгэнд нь давуу эрх олгож, нөгөөг нь хохироодог байж болохгүй байх аа.

 

- Асуудлыг хуулийн дагуу шийдэж өг гэсэн үүрэг өгсөн нь үнэн. Ер нь цаг хугацаа хэрэгтэй.

 

 

- Яам бол төр захиргааны байр учраас төрийн тусгай хамгаалалтынхан л энэ асуудлыг мэдэх болохоос яамны удирдлагуудын хийдэг, шийддэг ажил биш байх аа. Урд хаалга зүгээр нээлттэй, хүмүүс орж гарч л байна шүү дээ.

 

-Ярилцсанд баярлалаа.