Ирээдүйд үндэсний шигшээ багийн тоглогч болж улсынхаа нэр төрийг хамгаалах шилдэг хөлбөмбөгчдийг бэлдэх “Элит академи”-ийн нээлтийн үйл ажиллагаа маргааш болно.

16, 19 хүртэлх насныхны дунд болох “Элит академи”-ийн бэлтгэл өчигдөр, өнөөдөр МХБХ-ны талбайд болж байна.

Уг холбооны Техникийн хэлтсийн захирал Хатем Соусси, Дасгалжуулагчийн боловсрол, залуучууд, өсвөрийн хөлбөмбөгийн асуудал хариуцсан мэргэжилтэн Растислав Бозик нар “Элит академи”-ийн бэлтгэлийг удирдан явуулна.

Монголын 16, 19 хүртэлх насны шигшээ багууд 9, 11-р саруудад Азийн АШТ-ий урьдчилсан шатанд өрсөлдөх учраас академийн үйл ажиллагаа шигшээ багийн тоглогчдыг олон сарын турш тогтмол формтой байхад том нөлөө үзүүлэх юм.

Академид суралцахад ямар нэгэн хураамж төлөхгүй бөгөөд МХБХ-нд бүртгэлтэй клубт тоглодог авъяаслаг, хөдөлмөрч, өөртөө итгэлтэй хүүхэд залууст “Элит академи”-ийн үүд хаалга үргэлж нээлттэй гэнэ.