Тайландын нийслэл Бангкок хотын хөл хөдөлгөөн ихтэй дүүрэгт иргэдийн жагсаж байсан газрын ойролцоо бөмбөг дэлбэрсний уршгаар хоёр хүн амь үрэгдэж, 20 гаруй хүн гэмтсэн байна. "Central World" худалдааны төвийн ойролцоо болсон энэ дэлбэрэлтийн дараа амиа алдсан хоёр хүний нэг нь 12 настай хүү байжээ. Энэ хэрэг явдлаас хэдэн цагийн өмнө Тайландын зүүн хэсгийн нэгэн мужид зэвсэгтэй этгээдүүд Засгийн газрын эсрэг жагсаж байсан иргэд рүү гал нээж, таван настай охины аминд хүрсэн гэж BBC мэдээллээ.

Жагсагчид ерөнхий сайд Йинглак Чиннаватаас огцрохыг шаардсан ч тэрээр энэ шаардлагыг хүлээж авахаас татгалзаад байгаа юм. Тайландын сөрөг хүчнийхэн Йинглакийн тэргүүлдэг Засгийн газрыг түүний ах, ерөнхий сайд асан Таксин Чиннават удирдаж байна гэж үзэж, өнгөрсөн 11 дүгээр сараас хойш жагсаал тэмцлээ үргэлжлүүлсээр байна. Мөн тэд энэ сарын эхээр явуулсан парламентын сонгуулийг бойкотолсны зэрэгцээ санал авах байруудын 10 орчим хувьд нь санал хураалт саатсан  учраас нөхөн сонгууль явуулах шаардлагатай болжээ. Тайландад 2006 онд цэргийн эргэлт гарч, Таксиныг төрийн эрхнээс хүчээр буулгаснаас хойш тус улсад ихээхэн хагарал үүсээд байсан юм.

РАЛЬДИЙ.А /shuum.mn/