Ус бол чандмань эрдэнэ. Энэ ч утгаараа хүмүүсийн хамгийн их хэрэглэж байгаа ус нь цэвэр болоод стандартын шаардлага хангасан байх ёстой. Гэвч өнөөдрийн байдлаар Говь-Алтай аймгийн усны чанар мууг нийслэл хотын иргэд болоод уг аймгийн уугуул иргэд хүртэл ярьдаг. Мэргэжлийн хяналтын ерөнхий газраас аймаг, нийслэл болон иргэдийн хэрэглэж байгаа усанд шалгалт хийсэн байна. 

 Шалгалтаар Говь-Алтай аймаг хатуувтар устай аймаг болох нь тогтоогдсон байна. Мөн Говь-Алтай аймгийн Чандмань, Эрдэнэ, Цогт, Цээл, Бугат, Дарви, Алтай, Есөнбулаг сумын төвийн худгийн усны мөнгөний агууламж хэт өндөр буюу 17-142 дахин их агууламжтай байгаа нь тогтоогджээ. Говь-Алтай аймгийн Чандмань, Тайшир, Есөнбулаг сумын төвийн ундны усан дахь төмрийн агууламж стандарт үзүүлэлтээс хэт өндөр усыг хүн ам хэрэглэж байна. Говь-Алтай аймгийн Шарга (0.37 мг/л), Бигэр (0.14 мг/л), Чандмань (0.09 мг/л), Эрдэнэ (0.08 мг/л) сумын худгийн усанд хар тугалга ундны усны эрүүл ахуйн шаардлага (0.01 мг/л) хангахгүй байна гэдэг нь мэргэжлийн хяналтын ерөнхий газраас гаргасан шалгалтаар тогтоогдсон байна. Ингээд бодохоор өнөөдрийн байдлаар Говь-Алтай аймгийн иргэдийн ууж хэрэглэж байгаа ус нь стандарт хангаагүйн дээр иргэдийн өвчлөх нэгэн гол зүйл болсоор байна.