Төслийн хүрээнд  өнгөрсөн оны  есдүгээр сард нүүрсийг элсээр баяжуулах технологийн туршилт хийлгэхээр Тавантолгойн ордоос хоёр тонн нүүснийг Японы Нагата инженеринг компанид явуулаад байсан юм. Тэгвэл  уг туршилтын явц, үр дүнгийн талаар Японы төлөөлөгчид энэ сарын 12-14-ний өдрүүдэд Улаанбаатарт ирж танилцуулга хийсэн байна.

Туршилт явуулахдаа бүтээгдэхүүний гарцыг нэмэгдүүлэх үүднээс элсээр баяжуулах болон агаарын чичиргээт ширээний технологийн аргыг ашиглажээ. Ингэснээр элсээр баяжуулах технологиор 10-35 мм, агаарын чичиргээт ширээгээр 0.5-10 мм ширхэглэг бүхий нүүрсийг тус тус ангилан ялгасан бөгөөд гарц нь 9.2 хувийн үнслэгтэй нөхцлөөр 86.6 хувь, хэрэв үнслэгийг 10 хувьд хүргэвэл 89.3 хувь болохоор байгаа нь харьцангуй өндөр үзүүлэлт юм.

Цаашид туршилтыг үргэлжлүүлснээр  0.5 мм-ээс бага хэмжээний ширхэглэг бүхий нунтаг нүүрсийг хэрхэн ашиглах, Монголын элсний нарийвчилсан судалгаа хийх, улмаар бага оврын хагас үйлдвэрлэлийн зориулалт бүхий туршилтын үйлдвэр байгуулах боломжийг эрэлхийлэх зэрэг асуудлууд шийдлээ олно гэдэгт итгэлтэй байгаа аж.