“Big Bang” хамтлагийн гишүүн T.O.P шүтэн бишрэгчдэдээ дахин нэг таагүй мэдээ дуулгажээ.  

Тэрбээр энэ сарын 7-нд инстаграм хуудсаараа шууд дамжуулалт (live) хийсэн бөгөөд өөрийг нь хайрлаж, дэмждэг хүмүүсээс уучлалт гуйсан байна. Мөн өнгөрсөнд хийсэн бүх зүйлдээ маш их харамсаж буйгаа илэрхийлээд "Би БНСУ-д дахин уран бүтээл туурвих бодолгүй байна. Яагаад гэвэл ард иргэд нь чөтгөр" гэжээ.

Харин сэтгүүлчдэд хандан "Миний хэлсэн үгийг нийтлэл болгох хэрэггүй" хэмээн анхааруулжээ. Гэсэн ч төд удалгүй Naver, Nate зэрэг томоохон сайт энэ талаар нийтлэл гаргажээ.

Хүмүүс реппэр T.O.P-ийн энэ үйлдлийг маш их шүүмжилсэн бөгөөд “Дахин Солонгос хэлээр ярих хэрэггүй. Гадаадад очиж амьдраарай”, “Бидний мөнгөөр баян болсон байж биднийг доромжилж байна” гэх зэрэг сөрөг сэтгэгдлүүдийг үлдээжээ.

T.O.P 2019 оны аравдугаар сард инстаграмдаа “Надад дахин Кпопт хөл тавих бодол алга” хэмээн бичиж байсан юм. Шүтэн бишрэгчид нь үүнийг хошигнол хэмээн тайлбарлаж байсан ч реппэр маань энэ удаад дуу гаргахгүй гэдгээ албан ёсоор мэдэгдлээ.

T.O.P-ийн хувьд 2017 онд мансууруулах бодистой нэр холбогдож шүүхээс хоёр жилийн тэнсэн харгалзах ял авсан билээ. Түүний энэхүү үйлдлийг Солонгосчууд маш ихээр шүүмжилсэн. Үүний дараа реппэр T.O.P нойрсуулах эм хэтрүүлэн хэрэглэж сэхээн амьдруулах тасагт хүргэгдэж байв. Ийнхүү шүтэн бишрэгчид нь түүний энэхүү үйлдлийг “Амиа хорлох оролдлого” хэмээн таамаглаж байсан юм.

Тэрбээр 2019 оноос инстаграм хуудсаа идэвхтэй ашиглаж эхэлсэн ч БНСУ-ын ард түмний доромжилсон сэтгэгдлүүд түүнийг тайван байлгаагүй бололтой. Учир нь өнгөрсөн аравдугаар сард T.O.P “Доромжилсон сэтгэгдэл гэдэг бол аллага. Эрх чөлөөг ч бас хариуцлага дагах ёстой” хэмээн сторидоо оруулж байжээ.

Big Bang хамтлаг ирэх дөрөвдүгээр сард "Coachella" наадамд оролцох бөгөөд хүмүүс тэднийг БНСУ-д биш АНУ-ын зах зээлд уран бүтээл хийнэ хэмээн таамаглаж байгаа аж.