70 дахь удаагийн Берлиний олон улсын кино наадам болж өндөрлөлөө. Энэ жилийн Берлиний кино наадмын хамгийн дээд шагналыг Иран улсын кино найруулагчийн бүтээл хүртээд байна.

Берлиний Олон улсын кино наадам 2-р сарын 20-нд эхэлж, 3-р сарын 01 буюу өчигдөр өндөрлөж байна. Энэхүү кино наадмын хамгийн дээд шагнал болох Алтан Баавгайг Ираны “There Is No Evil” гэх кинонд олгоод байгаа юм. Энэ жилийн Алтан баавгайн эзэн болсон бүтээлийг Ираны кино найруулагч Мохаммад Расулоф найруулан, үзэгчдийн хүртээл болгожээ. Мохаммад Расулоф Берлин хотод болсон кино наадамд өөрийн биеэр очиж чадаагүй ч түүний охин Баран эцгийнхээ нэрийн өмнөөс шагналыг гардан авчээ.

Ираны өнөөгийн төр засгийг шүүмжлэх хандлагатай бүтээл туурвидаг Мохаммад Расулофыг гадаад улс орон уруу зорчихыг хориглосноос гадна 2017 оноос эхлэн кино найруулагчаар ажиллахыг мөн хориглоод байж. Тэрээр цаазын ялын талаар өгүүлэх “There Is No Evil” киног нууцаар туурвиж, энэхүү бүтээлээрээ Алтан Баавгайн шагналыг авлаа. Олон улсын хүний эрхийн байгууллагын мэдээллээр Иран улсад жил бүр олон зуун хүн цаазын ялаар амиа алддаг байна.  Энэ жилийн Берлиний кино наадмын хоёр дугаар байрт Америкийн кино  найруулагч Элиза Хиттмэний бүтээл орсон байна.