Монгол Улсын Шинжлэх ухааны академийн Археологийн хүрээлэнгийн доктор Ц.Төрбат ахлагчтай судлаачид Монгол Алтай судлалын хүрээлэнтэй хамтран 2008-2010 онд “Монгол Алтайн баруун хэсгийн түүх, археологийн дурсгалууд II, Ховд” төслөөр олон тооны дурсгал илрүүлжээ. Судлаачид хадны зургаан оршуулгын олдвор хэрэглэгдэхүүнийг судлаж, ХБНГУ-ын Райнландын Орон нутгийн холбооны харьяа Бонн дахь Ландес Музей болон Көльний Мэргэжлийн дээд сургуулийн Сэргээн засварлалт, бэхжүүлэлтийн ухааны, Офенбах дахь Германы ширний музей зэрэг газруудад гурван жилийн хугацаанд сэргээн засварлаж бэхжүүлсний дараа эх нутагтаа авчирч нийтийн хүртээл болгож байгаа нь энэ юм байна.

 

Түүнчлэн МУИС-ийн багш, доктор У.Эрдэнэбат ахлагчтай судлаачдын 1997 онд Баянхонгор аймгийн Баянцагаан сумын Гичгэнэ багийн нутаг Дугуй цахирын хадны оршуулгын олдворуудын эрэгтэй хүүхдийн торгон дээл, түүний хуулбар үзвэрүүд үзэсгэлэнд тавигджээ.

 

Үзэсгэлэнд Түрэгийн үеийн дайчдын төмөр дөрөө, эмээлийн мод, оломны арал, Хятан гүрний үеийн эсгийн хэвнэг, малгай, торгон дээл, загасны хайрсаар хийсэн хавтага зэрэг анх удаа монгол нутгаас илэрч олдсон олдворууд болон 14 дүгээр зууны үеийн дайчдын бүсний тоног, модон аяга зэрэг 170 шахам үзмэрийг дэлгэн үзүүлж байна.