Улсын арслан П.Бүрэнтөгс аймгийн арслан Н.Батсуурьт, улсын арслан Д.Ганхуяг аймгийн арслан Э.Оюунболдод, улсын гарьд Н.Ганбаатар аймгийн арслан Т.Баасанхүүд өвдөг шороодсон юм.

Түүнчлэн энэ даваанд олны анхаарлыг гойд татсан оноолт нь Дундговь аймгийн хоёр бөхийн барилдаан байлаа. Улсын харцага Л.Пүрэвжав, аймгийн хурц арслан А.Алтанхуяг нарын барилдаанд арслан түрж хөөсөн ч харцага тогтмогц нь зайлаад давчихав. Ийнхүү Л.Пүрэвжав харцага улсын заан цолны төлөө дахин зүтгэж байна. Тэрээр наадмын долоогийн даваанд гурван удаа өвдөг шороодсон билээ. Хурц арслан А.Алтанхуяг улсын цолд хүрч чадсангүй.

Улсын уран барилдаант начин Э.Энхбат улсын начин Л.Нямсүрэнг шуудагны барьцнаас шахаж татан давлаа.

Харин улсын гарьд И.Доржсамбуу аймгийн арслан Шинэбаатарыг давсан хэмээн үзэж асарт очсон байснаа эргэн ирж, дахин барилдаж давлаа.

Бүх цэргийн наадамд түрүүлээд хэдхэн хонож буй аймгийн арслан Л.Цэрэнтогтох улсын харцага Ө.Бат-Оршихыг шуудагны барьцнаас шахаж, түрж хөөгөөд давав. 

Улсын наадмын түрүү үзүүр, их шөвөгт яригдаж байсан бөхчүүдийг аймгийн арслангууд ээлж дараалан давж, улсын цолны босгонд тулж ирчихээд байна.