АНУ-ын Вашингтон ДиСи хотноо зохион байгуулж буй МҮОНРТ-ийн үзэгч, сонсогчдын уулзалт хоёр дахь өдрөө үргэлжилж байна.

Уулзалтын хүрээнд АНУ-д ажиллаж амьдарч буй монголчуудын өдөр тутмын амьдралын онцлог, нийгэм соёлын асуудлаар мэдээ мэдээлэл, нэвтрүүлэг бэлтгэн МҮОНРТ-д нийлүүлдэг сэтгүүлчдийн төлөөллийг шагналаа.  

Шагналыг СТА, дуучин Л.Болдбаатарын “Морин жилийн хийморь” уран бүтээлийн тоглолтын үеэр гардуулсан юм. МҮОНРТ-д олон жилийн турш үр бүтээлтэй ажиллаж байсны зэрэгцээ хилийн чинадаас мэдээллийн баазаар хангах үүргийг өөрсдийн сэтгэл зүрхээрээ хийж гүйцэтгэсээр ирсэн сэтгүүлч Д.Адилзаяа, Б.Мижигдорж нар Радио телевизийн тэргүүний ажилтан цол тэмдгээр энгэрээ мялаав.

МҮОНРТ-ийн Ерөнхий захирал Н.Наранбаатар, дэд захирал Ё.Батбаяр нар шагналыг гардуулах үеэрээ “МҮОНРТ хэмээх их айлтай нэгэн насныхаа амьдралыг холбож, хилийн чинадаас Монголын үзэгчдийг танин мэдэхүй, нийгэм, соёлын өндөр ач холбогдол бүхий мэдээ мэдээллээр хангаж ирсэн явдалд гүн талархал илэрхийлье” гээд цаашдын ажилд нь амжилт хүслээ.