Монгол Улсад хөрөнгө оруулахыг уриаллаа

Шуурхай:

Монгол Улсад хөрөнгө оруулахыг уриаллаа

2014-04-24 14:55:18

Монгол Улсын Ерөнхий сайд асан, УИХ-ын гишүүн Р.Амаржаргал Төрийн баялгийн сангийн институтаас энэ сарын 22-23-ны өдрүүдэд Хонгконгт зохион байгуулсан “Институтын сангийн чуулга уулзалт, Ази тив 2014” олон улсын чуулга уулзалтад оролцлоо.

Төрийн баялгийн сангийн институт нь Засгийн газрын оролцоотой хөрөнгө оруулалт, хөрөнгө оруулалтын эрсдэл, засаглал, худалдаа, эдийн засаг болон төрийн хөрөнгө оруулалтын бодлогын асуудлуудыг судлан, хэлэлцүүлэг зохион байгуулдаг дэлхийн тэргүүний байгууллага юм.

Хонгконгт зохион байгуулсан энэ удаагийн чуулга уулзалтаар Ази тив дэх хөрөнгө оруулалтын боломжууд болон сорилтууд, бодит хөрөнгө оруулалтыг судлах, бодлого боловсруулах, хөрөнгө оруулалтыг болон хөрөнгө оруулагчийг хамгаалах зэрэг чухал асуудлыг дэлхийн томоохон 100 гаруй хөрөнгө оруулагч хэлэлцлээ.

Чуулга уулзалтад Хятадын хөрөнгө оруулалтын корпораци, Канадын тэтгэврийн сан, Европийн Төв банк, Инвест Хонгконг, Хонгконгийн Худалдааг хөгжүүлэх зөвлөл, Солонгосын хөрөнгө оруулалтын корпораци, Ираны Үндэсний хөгжлийн сан зэрэг олон улсын төрийн болон хувийн хөрөнгө оруулалтын сангуудын удирдах түвшний төлөөлөгчид оролцлоо.

Р.Амаржаргал гишүүн уг арга хэмжээнд хүндэт зочноор уригдан Ази тив дэх хөрөнгө оруулалтын боломжууд болон сорилтууд хэлэлцүүлэгт оролцож, чуулга уулзалтын хаалтыг үгийг хэллээ. Тэрбээр Монгол Улс хөрөнгө оруулалтыг дэмжих зорилгоор Хөрөнгө оруулалтын тухай шинэ хууль, Хөрөнгө оруулалтын сангийн болон Үнэт цаасны хууль зэрэг чухал эрх зүйн баримт бичгүүдийг Улсын Их Хурлаас батласан тухай мэдээлж, чуулга уулзалтад оролцсон дэлхийн томоохон хөрөнгө оруулагчдад хандан Монголд хөрөнгө оруулахыг уриалав.

Нийтэлсэн: Ж.Мядагбадам

	Монгол Улсад хөрөнгө оруулахыг уриаллаа
Үзсэн: 874	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.