Монголын нийт лам нар нэгдэж “Асралын аян – 2” сайн үйлсийн аян өрнүүллээ. Лам хуврагууд өнгөрсөн жил "Асралын аян" зохион байгуулж Улсын онцгой комисст 10 гаруй сая төгрөг болон хэрэгцээт зүйлс хандивлаж байсан бөгөөд энэ удаад Үндэсний эрх чөлөө, тусгаар тогтнолоо сэргээсний 109 жилийн ойн баяртай холбогдуулан зорилтот бүлгийн 300 гаруй айл өрхөд хүнс хүргэжээ.

Тодруулбал, энэ үйл ажиллагааны хүрээнд Монгол лам нарын чуулган холбооны бүхий л лам хуврагууд сэтгэлийн хандив өргөж энэ сарын 28-нд 15 машинтай 60 лам нийслэлийн зургаан дүүргийн тусламж нэн шаардлагатай байгаа 300 гаруй айл өрх тус бүрт 50 мянган төгрөгийн үнэ бүхий мах, гурил, аарц, ургамлын тос хүргэж өгсөн байна. Түүнчлэн дээрх лам хуврагууд “Асралын аян – 2” сайн үйлсийн аян өрнүүлэх явцдаа Улсын онцгой комисс, Нийслэлийн онцгой комиссоос гаргасан шийдвэрийн дагуу халдвар хамгааллын дэглэмийг сахиж хүн хоорондын зайг баримтлан, хамгаалалтын хувцас, амны хаалт, бээлий хэрэглэж зохих заавар журмыг чанд мөрджээ.