Үндэсний телевиз
Цагийн хүрд
Найм арваннэг
“Гэр хорооллын Христийн сүмүүдэд гаднаас ирсэн эмч нар өндөр үнэтэй тариаг итгэгч нартаа үнэгүй хийж байна. Уг тариа нь үений өвчин намдаадаг бөгөөд өвчтэй хэсэгтээ 7-8 удаа тариулдаг” гэх мэдээллийг нэгэн иргэн бидэнд өгсөн юм. Мэдээллийн дагуу бид Христэд итгэгчдийн сүмүүд рүү залгаж, холбогдох хүмүүсээс тодруулснаар БЗД-ийн хоёрдугаар хороонд орших “Гэрэлт-Ирээдүй” сүмд хувааарийн дагуу уг тариа хийгдэх болсныг дууллаа.
Мэдээллийн мөрөөр “Гэрэлт-Ирээдүй” сүмд очиход БЗД-ийн Мэргэжлийн хяналтын хэлтсийн байцаагч нар ирж, тариа, бусад зүү тариуруудыг хурааж байхтай таарсан юм. Ингээд БЗД-ийн Мэргэжлийн хяналтын хэлтсийн Эмнэлгийн тусламж үйлчилгээ, чанар аюулгүй байдлын улсын байцаагч О.Ёндонцоогоос дараах тодруулгыг авлаа.
О.Ёндонцоо: Шалгалт цаашид хуулийн дагуу үргэлжлэн явагдана
- Та иргэний мэдээллийн дагуу энд ирсэн үү?
- Тийм ээ. Иргэний мэдээллийн дагуу өнөө өглөө “Гэрэлт-Ирээдүй” сүм дээр бид 10 цагийн үед ирсэн. Бид эрүүл мэндийн тухай хууль, төрийн хяналт шалгалтын тухай хуулийн дагуу холбогдох тодруулгуудыг зохион байгуулагчдаас авч, шаардлагатай арга хэмжээнүүдийг авч ажиллаж байна.
- Зохион байгуулагчдын зүгээс ямар тайлбар хийж байна вэ?
- Бидний авсан тодруулгаар бол америк иргэн нь Монгол Улсад эрүүл мэндийн үйл ажиллагаа явуулах албан ёсны зөвшөөрөл аваагүй, Монгол эмч нарын хувьд эмчилгээ хийх зөвшөөрөлтэй юм байна. Өнөө өглөө биднийг ирэхэд 50 орчим хүн цугларсан хэдий ч тариа хийгдэж эхлээгүй байсан. Зохион байгуулагчидтай нь уулзаж, Монгол Улсын хууль тогтоомжийн дагуу эмнэлгийн орчинд эмчилгээ явуулах шаардлагатайг анхааруулснаар иргэдийг тараасан.
- Одоогоор хэдий хэмжээний эм тариаг хураасан бэ? - Нарийвчилсан тоог хараахан гаргаж амжаагүй байна. Ямар ч байсан хэрэглэж байсан эм тариа, эмчилгээний хэрэгслүүдийг хурааж авсан байгаа. Шалгалт цаашид хуулийн дагуу үргэлжлэх бөгөөд маргааш эмчилгээ явуулж байсан эмч нарын багтай уулзаж, илүү нарийвчилсан тодруулгуудыг авахаар цаг товлоод байна.
- Иргэд нэлээд бухимдалтай байх шиг байна?
- Иргэдийн зүгээс бидний ажиллагаанд хүндрэл учруулж, уур бухимдлаа илэрхийллээ. “Цаг авчихсан байна”, “Хаана үзүүлэх нь миний дур” гэхчлэн эсэргүүцэх хүмүүс энд байна.
- Тарианы найруулгад юу юу орсон байна?
- Тариагаа 10 граммаар шахаж бэлдсэн байна. Үндсэн найруулгад 20 процентийн глюкоз, витамин В12, ледакен гэсэн тарианууд оржээ. Манай эм ханган нийлүүлэгчдээс өчигдөр худалдан авсан, хугацаа нь дууссан зөрчил байхгүй. Хамгийн гол нь энэ гурван тариаг хооронд нь нийлүүлэн найруулж, урьдчилан тарихаар бэлтгэн шфрицэнд шахаж, эмнэлгийн бус орчинд үйл ажиллагаагаа зохион байгуулж байгаа нь хууль зөрчсөн асуудал болж таарч байгаа юм. Тариаг эмчлүүлэгчийн нүдэн дээр шинэ шфрицний уутыг задлан, найруулан хийж байх ёстой.
БЗД-ийн Мэргэжлийн хяналтын хэлтсийн байцаагч дээрх тодруулгыг өгч байх завсар уг үйл ажиллагааг зохион байгуулж буй хүмүүс нэлээдгүй бухимдалтай харагдлаа. Христийн цуглааны сайн дурын ажилтан гэж өөрийгөө танилцуулсан Т.Батжаргал ийм тайлбар хийж байна.
Т.Батжаргал: 500 орчим хүнд энэ тариаг хийсэн
-Энэ үйл ажиллагааг хууль бус гэдгийг та мэдэж байсан уу?
- Нөхөн сэргээх эмчилгээний хэлбэрээр цуглааны итгэгчдийн хүрээнд эмчилгээ хийх тохиролцоогоор анх АНУ-ын Хайнсан Вот хэмээх хүн миний урилгаар манай улсад ирсэн юм. Энэ эмч маань дэлхийн 70 гаруй оронд 100 мянган хүнд энэ эмчилгээг хийсэн туршлагатай хүн.
- Нэг дор тариаг олноор нь хийсэн нь ямар учиртай юм бэ? - Түүнийг бол би мэдэхгүй. Эмчилгээ явуулж байгаа эмч нар мэднэ байх. Итгэл бишрэлийнхээ хүрээнд хүмүүст туслах зорилготойгоор л хийж байгаа ажил.
- Биднийг Хайнсан доктортойгоо уулзуулж болох уу?
- Болохгүй.
- Монгол эмч нарын багийг яаж бүрдүүлсэн юм бэ?
- Монгол эмч нар нь бүгд эмчилгээ хийх эрхтэй хүмүүс. Хайнсан докторыг дагалдаж, уг эмчилгээг хийх аргачлалыг сурах зорилготой юм.
- Яг ямар зорилгоор энэ эмчилгээг монголчуудад хийж байгаа юм?
- Хаврын улиралд хүмүүс ядардаг. Энэ төрлийн ядаргааг тайлах л зорилготой. Бүх тариаг эндхийн эм ханган нийлүүлэгчдээс авсан. Бид итгэгчдийнхээ хүрээнд зар тараагаад шаардлагатай үзлэг, эмчилгээнүүдийг үнэгүй хийсэн. Ний нуугүй хэлэхэд нөхөн сэргээх эмчилгээ л гэж ойлгоорой. Түүнээс биш туршилт, мансууруулах энэ тэр эмчилгээ ерөөсөө биш.
- Хэчнээн сүмд энэ төрлийн үйл ажиллагаа явуулсан бэ?
- Өнөөдөр дөрөв дэх өдрөө үргэлжлэх байсан ч Мэргэжлийн хяналтын байгууллагын шаардлагын дагуу зогсоогоод байна. Баянгол, Сүхбаатар, Баянзүрх дүүргийн сүмүүдийн хүрээнд 500 орчим хүмүүст энэ тариаг хийсэн.
- Толгойт орчмын сүмүүдээр мөн ийм төрлийн тариа хийгдсэн гэсэн?
- Түүнийг би мэдэхгүй. Биднээс өөр хүмүүс хийж байгаа байх.
“Гэрэлт-Ирээдүй” сүмийн байранд нэг иймэрхүү байдалтайгаар яриа өрнөлөө.
Мэргэжлийн хяналтын байцаагч нар тариануудыг ачих үүрэг өгтөл Т.Батжаргал гэгч залуу “Үгүй. Бидний нүдэн дээр устга. Бид өгч явуулахгүй” гэж адрах юм. Байцаагч нар хууль хяналтынханд хандана гэснээр залуу жаахан номхров. Тэрээр “Доктортой явахаас нь өмнө уулзахгүй бол дөрөв дэхэд явна шүү” гэх тайлбарыг хэлэхээсээ хүртэл эмээсэнгүй. Хаа холын АНУ-аас ирсэн эмч гэх нэртэй хүний цаг заванд тааруулж, төрийн ажил явуулах хэрэг үү гэсэн харамсал төрсөн сэтгүүлчид “Арай ч явуулчихгүйгээр энэ хэргийг нягтлах байлгүй дээ” гэж хэлэх нь сонсогдлоо.
“Гэрэлт-Ирээдүй” сүмийн үйлчилгээний ажилтан “Танд ямар хүн мэдээлэл өгснийг бидэнд одоо хэл. Утасных нь дугаарыг өг” гэхчлэн шаардаж, ажлын минь үнэмлэхийг хувилан авч үлдлээ. Итгэгч нараа яриа өгч болохгүй гэсэн пастарын тушаалаар сүмийнхэн намайг гарангуут хаалгаа торхийтэл түгжих нь тэр. Шашны нэр барьсан дээрэнгүйн үзэл энд жинхэнэ утгаараа хэрэгжиж байх шиг санагдсаныг нуугаад яахав.
Ийнхүү Монгол Улсын эмчилгээний стандартад нийцсэн эсэх нь ч мэдэгдэхгүй уусмалыг 10 граммын шфрицээр 7-8 удаа мөр, өвдөг, тохойндоо хэчнээн хүн тариулсан эсэх нь тодорхойгүй хэвээр үлдлээ. Христийн сүмийн нэгэндээ туслах нэрээр өрнөдөг элдэв арга хэмжээнүүд эрүүл мэндийн салбар руу чиглэж эхэлснийг хэн хүнгүй хараа хяналтдаа авах цаг нь болжээ.
.jpg)
| Христийн сүмүүдийн хууль бус ажиллагаа эрүүл мэндийн салбарыг чиглэж байна | ||
| Үзсэн: 6149 | Mongolian National Broadcaster |
М.Золзаяа
Б.Цоожчулуунцэцэг
Р.Слава
Сэтгэгдэл бичих:
АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.