“Жонон” хамтлаг, уртын дуучин Б.Алтанжаргал нарын хамтрах “Тэнгэрийн салхи” тоглолт удахгүй зохион байгуулагдахаар болжээ.

Тэд 2020 оны арваннэгдүгээр сарын 12,13-нд тоглох байсан ч Улсын онцгой комиссын тогтоолын дагуу цуцлагдаж, тодорхойгүй хугацаагаар хойшлогдоод байсан билээ.

Харин Монгол Улсын Засгийн газрын өчигдрийн хуралдаанаар халдвар хамгааллын дэглэмийг сахиулах хариуцлагын гэрээг хийж, 50 хувийн дүүргэлттэйгээр урлагийн тоглолт, арга хэмжээ нээхийг зөвшөөрсөн учир ийнхүү бэлтгэл ажилдаа оржээ.

Уран бүтээлчид уг тоглолтоо ирэх арванхоёрдугаар сард хийхээр төлөвлөжээ. Тасалбар нь цахимаар бүртгэлтэй учраас 2020 оны буцаагдаагүй байгаа бүх тасалбар хүчинтэй аж.