Бүгд Найрамдах Чех улсаас Монгол Улсад суугаа Онц бөгөөд Бүрэн эрхт Элчин сайдаар дөрвөн жил ажиллаад нутаг буцах гэж буй ноён И.Бродский өнөөдөр Монголын үндэсний олон нийтийн радио, телевизээр зочилж, Ерөнхий захирал А.Бүрэнбаатартай албан уулзалт хийлээ.

Уулзалтын эхэнд Элчин сайд И.Бродский “Баримтат болон хүүхэлдэйн кинонуудыг монголын үзэгчдэд толилуулахад дэмжиж хамтран ажилласан МҮОНРТ-д талархал илэрхийлэв. Мөн МҮОНТ, Чехийн төв телевиз хооронд холбоо харилцаа тогтооход тус дөхөм үзүүлсэндээ баяртай байгаагаа илэрхийлж, хоёр телевизийн харилцаа цаашид өргөжин тэлнэ” гэж итгэж буйгаа хэллээ. Мөн МҮОНРТ-ийн Ерөнхий захирал А.Бүрэнбаатарын дэвшүүлсэн МҮОНРТ-ийн шинэ бүтээл “Нүүдэлчин зөн” контентийг Чех улсын телевизүүдээр гаргах саналыг найрсгаар хүлээн авав. Түүнчлэн манай хоёр улсын телевиз, радиогийн уран бүтээлчдийг хооронд нь холбож, туршлага солилцох сургалт зохион байгуулах, мэдлэгээ хуваалцах, хамтарсан бүтээл туурвих, бүтээл солилцох зэрэг бүх чиглэлд дэмжлэг үзүүлэн ажиллахыг шинээр томилогдон ирэх Элчин сайд, түүний багийнханд захиж үлдээнэ гэсэн юм.

Монгол, Чех хоёр улсын хоорондын харилцааны нэг онцлох чиглэл болсон, тахь буцаан нутагшуулах төсөл хөтөлбөр, энэ хүрээнд өрнөж буй үйл явдал, мэдээ мэдээллүүдийг цаг тухай бүрт нь сурвалжилж, сурталчлан дэлгэрүүлэх үйлсэд МҮОНРТ-ийг урьдын адил идэвхтэй хамтран ажиллана гэж итгэж буйгаа мөн илэрхийллээ.

Ноён И.Бродский эх орондоо буцаж очсон хойноо ч ээнэгшин дотноссон Монгол орны хөгжил цэцэглэлт, монгол хүмүүсийн сайн сайхны төлөө санаа тавин ажиллах сэтгэгдэл дүүрэн байлаа.