“Гүнжийн нуур” нь өвөрмөц тогтоцтой, ус нь дундардаггүй, иргэдийн чөлөөт цагийг өнгөрүүлэх, зугаалах орчныг 2.2 га талбайд бүрдүүлж байгаа аж.

 

Өнөөдрийн байдлаар тохижилтын ажил 50 гаруй хувьтай байгаа бөгөөд нийслэлээс 441 сая төгрөгийг зарцуулж байна. Хөрөнгийн асуудал хугацаандаа шийдэгдвэл долоодугаар сард Хотын захиргаанд хүлээлгэж өгөхөөр төлөвлөгөөний дагуу ажиллаж байгаа гэдгийг төсөл гүйцэтгэгч хэллээ.

Мөн ногоон байгууламжийг нэмэгдүүлэх зорилгоор хийгдэх дараагийн ажил нь Тасганы овоон цэцэрлэгт хүрээлэн. Нийслэл Дэлхийн банкны “Цэвэр агаар” сантай хамтран санхүүжилтийг шийдвэрлэх бөгөөд Чингэлтэй дүүрэгт байрлах Тасганы овооны 1.7 га газрыг бүхэлд нь зүлэгжүүлэн, тохижуулах юм. Тохижилтын ажлын төлөвлөгөө, зураг төсөл бэлэн болсон бөгөөд долоодугаар сард ажил нь эхэлж есдүгээр сард ашиглалтад оруулахаар төлөвлөжээ.  

 

Сул шороон хөрс бүхий гудамж талбайг хайрган хучилттай болгож тохижуулж  байгаа ажлын нэг  жишээ нь Сүхбаатар дүүргийн 1-р хорооны байшин хороолол дундах 2000 м/кв талбай юм. Тус газар нь бүхэлдээ сул шороо байсан бөгөөд засаж, тохижуулснаар хүүхдийн тоглоомын талбай бүхий ногоон байгууламж болжээ. Нийт 2000 м/квт талбайн 1000-ыг нь зүлэгжүүлж байгаа бол үлдсэн хэсгийг цементлэж хүүхдийн тоглоом, сагсан бөмбөгийн шийд суурилуулж тохижуулжээ. Уг ажлыг “Баз Асар” ХХК гүйцэтгэж байгаа бөгөөд нийслэлийн төсвөөс 265 сая төгрөг зарцуулж байгаа юм. Өнөөдрийн байдлаар 95 хувийн гүйцэтгэлтэй, төлөвлөгөөний дагуу зургаадугаар сард хүлээлгэн өгөхөөр ажиллаж байна.