НМХГ эм, биобэлдмэлийн чанарын хяналтын чиглэлээр нийслэлд үйл ажиллагаа явуулж байгаа 18 европ эмийн үйлдвэр, нэг халдваргүйтгэлийн бодис үйлдвэрлэх үйлдвэрийн үйл ажиллагааг шалгажээ.
Шалгалтад хамрагдсан 19 үйлдвэрт эмийн үйлдвэрлэлд тавих ерөнхий стандартын хэрэгжилт 79.6 хувьтай байгаа нь 2008 оны улсын дундажаас 6.1 хувиар өссөн үзүүлэлттэй гарсан байна. Зах зээлээс авсан хөндлөнгийн хяналтын 73 цувралын сорьц авч шинжлүүлэхэд 23 хувь нь тохироогүй гарсан бөгөөд энэ нь 2008 оныхоос 8.4 хувиар буурсан байна. Үүнээс үзэхэд бүтээгдэхүүний стандарт, технологийн зааврын мөрдөлт болон чанарын хяналтын тогтолцоонд ахиц гарсан гэж үзжээ.
Мөн шалгалтад хамрагдсан үйлдвэрүүдийн лабораторийн 94.7 хувь нь итгэмжлэгдээгүй байгаа нь үйлдвэрлэсэн бүтээгдэхүүний чанар, аюулгүй байдлыг баталгаатай гэхэд хүндрэлтэй байгаа аж.