УИХ-ын 2022 оны намрын ээлжит чуулганы 2023 оны нэгдүгээр сарын 12-ны өдрийн Байнгын хорооны даргыг сонгох, чөлөөлөх тухай асуудлыг хэлэлцэв. Хууль зүйн байнгын хорооны санал, дүгнэлтийг УИХ-ын гишүүн Л.Мөнхбаатар танилцууллаа.

Монгол УИХ-ын тухай хуулийн 8 дугаар зүйлийн 8.1.7 дахь заалт, 26 дугаар зүйлийн 26.4 дэх хэсэг, Монгол УИХ-ын чуулганы хуралдааны дэгийн тухай хуулийн 27 дугаар зүйлийн 27.1 дэх хэсэгт заасныг үндэслэн Байнгын хорооны даргыг сонгох тухай асуудлыг Хууль зүйн байнгын хороо 2023 оны нэгдүгээр сарын 10-ны өдрийн хуралдаанаараа хэлэлцсэн байна. Тус хуралдаанд УИХ-ын гишүүн, Улсын Их Хурал дахь Монгол Ардын Намын бүлгийн дарга Д.Тогтохсүрэн нэр дэвшигч УИХ-ын гишүүн Баттөмөрийн Энхбаярыг Улсын Их Хуралд сонгогдон ажилласан туршлага, төрийн ажлын мэдлэг, ур чадварыг харгалзан Хууль зүйн байнгын хорооны даргад нэр дэвшүүлэн хэлэлцүүлжээ.

Баттөмөрийн Энхбаяр нь 1994 онд Дорнод аймгийн Чойбалсан хотын ерөнхий боловсролын 1 дүгээр дунд сургууль, 1998 онд Монгол Улсын Их Сургуулийн Хууль зүйн дээд сургуулийг төгссөн. Хуульч мэргэжилтэй, хууль зүйн ухааны магистр. 1998-2004 онд Улаанбаатар-Эрдэм дээд сургуульд багш, 2000-2001 онд УИХ-ын гишүүний туслах, 2001-2002 онд Улсын Их Хурал дахь Монгол Ардын Намын бүлгийн ажлын албанд референт, хуулийн зөвлөх, 2003-2006 онд Газрын харилцаа, геодези, зурагзүйн газрынТамгын газрын дарга, 2006-2007 онд Хууль зүй, дотоод хэргийн яамны Төрийн захиргаа, удирдлагын газрын дарга, 2009-2011 онд Нийгмийн даатгалын өрөнхий газрын Тамгын газрын дарга, 2011- 2013 онд Монгол Ардын Намын бүлгийн даргын зөвлөх, 2014-2016 онд Улсын Их Хурал дахь Монгол Ардын Намын бүлгийн зөвлөх, 2016-2018 онд Хууль зүй, дотоод хэргийн дэд сайд, 2020 оноос Монгол УИХ-ын гишүүнээр сонгогдон ажиллаж байгаа юм.

Хууль зүйн байнгын хорооны даргад УИХ-ын гишүүн Баттөмөрийн Энхбаярыг нэр дэвшүүлснийг хуралдаанд оролцсон гишүүдийн олонх дэмжсэн байна.

Хууль зүйн байнгын хорооны дээрх санал, дүгнэлттэй холбогдуулан УИХ-ын гишүүн Д.Ганбат асуулт асууж, Б.Энхбаяр гишүүнээс хариулт авсны дараа санал хураалт явуулахад чуулганы нэгдсэн хуралдаанд оролцсон УИХ-ын 55 гишүүний 47 буюу 85.5 хувь нь дэмжив. Үүгээр “Байнгын хорооны даргыг сонгох, чөлөөлөх тухай” УИХ-ын тогтоол батлагдаж, УИХ-ын дарга Г.Занданшатар нэгдсэн хуралдаанд эцсийн найруулгыг танилцуулсан юм.