Шууд Chart

Хархорин хотын суурин дээр ил музей барина

2014-07-11 10:27:41

Соёл, спорт, аялал жуулчлалын сайд хатагтай Ц.Оюунгэрэл болон ХБНГУ-ын Археологийн хүрээлэнгийн Ерөнхийлөгч хатагтай Флесс нар Хархорум хотын сүмийн туурийг ил музей болгох хамтын ажиллагааны тухай харилцан ойлголцлын санамж бичигт гарын үсэг зурлаа.

ХБНГУ-ын Гадаад хэргийн яамны үйл ажиллагааны хүрээнд 2000-2009 онд Хархорум хотын “Их танхим” болон түүнтэй зэрэгцээ орших барилга байгууламжийг Германы Археологийн Институт, Монголын Шинжлэх Ухааны Академийн Археологийн хүрээлэнтэй хамтран судалсан байдаг юм.

Уг санамж бичгийн хүрээнд 2014 онд “Ил музей” байгуулах зорилгоор Талууд эртний нийслэл Хархорум хотын буддын туурийн үлдэгдэлийг сэргээн засварлана. Мөн цаашид соёлын өвийг сэргээн засварлах, “Ил музей”-д тавигдахаар сонгогдсон олдворуудыг нөхөн сэргээх болон үзэсгэлэнгийн танхимыг тохижуулахад хамтран ажиллах юм.

Монгол Улсын болон Холбооны Бүгд Найрамдах Герман улсын хууль тогтоомжийн дагуу мэргэжилтэн бэлтгэх, солилцох болон харилцан туршлага солилцох асуудлыг ч тусгасан байна.

Яамны зүгээс Холбооны Бүгд Найрамдах Герман Улсын судлаачид болон төсөлд шаардагдах овор ихтэй, зарим нэг буцах магадлалтай материал, тоног төхөөрөмжийн асуудлыг гаалийн татвараас чөлөөлөх тал дээр дэмжлэг үзүүлэх юм. 

Төслийг 2015 оны 12 дугаар сарын 31-ний өдөр бүрэн дуусгах зорилт  тавьж байна. Дашрамд дурдахад энэ жил хоёр орны хооронд Дипломат харилцаа тогтоосны 40 жилийн ой тохиож байгаа бөгөөд ойг тэмдэглэн өнгөрүүлэх болон 2014 оны хоёр талын харилцааны археологи, соёлын өвийг хадгалан хамгаалах салбар дахь хамтын ажиллагааны хүрээнд Монгол Улсын Өвөрхангай аймгийн нутаг дэвсгэрт орших Орхоны хөндийн судалгаа хийгдсэн түүх соёлын дурсгалт газар, түүнд оршин байгаа Монголын эртний нийслэл Хархорум хотыг түүхийн дурсгалт газар болгон баталгаажуулж, түүнийг удаан хугацаанд олон нийтэд нээлттэй болгохыг зорилго болгожээ.

Нийтэлсэн: Д.Жамбалдорж

Хархорин хотын суурин дээр ил музей барина  
Үзсэн: 1245 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй