Монгол Улсын төрийн соёрхолт, урлагийн гавьяат зүтгэлтэн, хүүхдийн зохиолч Жамбын Дашдондог агсны нэрэмжит “Уран жиргээ-2023” улсын уралдаан болох гэж байна.

Тус наадмын зорилго нь дэлхийн болон Монголын хүүхдийн шилдэг зохиол бүтээлийг хүүхэд багачуудад таниулах, сурталчлах, тэдний дунд уран уншлагын урлагийг хөгжүүлэхэд оршиж буй.

Насны ангилалын хувьд сургуулийн өмнөх нас ба цэцэрлэг, сургуулийн бага нас буюу 1-5 дугаар анги, дунд нас буюу 6-9 дүгээр анги, ахлах нас буюу 10-12 дугаар ангийн хооронд явагдана.

Зохион байгуулах журамд нэгдүгээр шат цэцэрлэг, сургуулийн хэмжээнд, хоёрдугаар шат дүүргийн хэмжээнд, гуравдугаар шат нийслэл хотын хэмжээнд, дөрөвдүгээр шат улсын хэмжээнд Монголын хүүхдийн ордонд ирэх дөрөвдүгээр сарын 21-нд болох аж.

Улсын хэмжээнд оролцохоор шалгарсан орон нутгийн хүүхдүүдийг дөрөвдүгээр сарын 17, 18-нд Монголын хүүхдийн ордонд бүртгүүлж, 19, 20-нд эрхийн мандатаа авах юм байна.

Тэргүүн байр “Уран жиргээ” гран при, нэгдүгээр байр МХО-ны “Эрдэм” алтан медаль, хоёр, гуравдугаар байр “Эрдэм” мөнгөн медаль, өргөмжлөл, дурсгалын зүйл гардах нь ээ.