“Amka dance” сургалтын төвийн багш, бүжиг дэглээч, бүжигчин, Э.Амаржаргал хоёр шавийн хамт Герман улсын Берлин хотод зохион байгуулагддаг “Tanzolymp”-ын ардын бүжгийн төрөлд шигшээ шатанд өрсөлдөхөөр болсон талаар бид өмнө нь мэдээлсэн.

Тодруулбал,  энэ сарын 16-20-нд Герман улсын Берлин хотод зохион байгуулагдсан “Tanzolymp” буюу "бүжгийн олимп"-ын шигшээд шатанд “Amka dance” сургалтын төвийн багш, соёлын тэргүүний ажилтан Э.Амаржаргал биечлэн, түүний шавь С.Номин, П.Номин нар цахимаар өрсөлдсөн байна.

Ийн 15 орны 565 оролцогч өрсөлдсөн “Tanzolymp”-оос Э.Амаржаргал мөнгөн медаль, С.Номин, П.Номин нар тусгай байрын шагнал хүртжээ.

Завхан аймгийн “Amka dance” сургалтын төвийн багш, сурагчдын сүүлд гаргасан амжилтаас дурдахад, “Friends in Moscow” олон улсын хөгжим, бүжгийн зургаадугаар наадам өнгөрсөн оны аравдугаар сарын 14-16-нд ОХУ-ын Москва хотод болж, ОХУ-ын уран бүтээлчдээс гадна Монгол, Болгар улсаас оролцогч оролцсон. Тус наадамд Монгол Улсаа төлөөлөн ардын бүжгийн төрөлд 25-аас дээш насны ангилалд өрсөлдсөн соёлын тэргүүний ажилтан, бүжиг дэглээч, бүжигчин, “Amka dance” сургалтын төвийн багш Э.Амаржаргал тэргүүн байр эзэлсэн.

Мөн Олон улсын бүжгийн нэгдсэн цахим хоёрдугаар уралдаан /IUCDC/ өнгөрсөн арваннэгдүгээр сард дүнгээ гаргахад олон ардын бүжгийн төрөлд Завхан аймгийн “Amka dance” сургалтын төвийн залуу бүжигчин Б.Алтжин болон С.Номин нар алтан медаль, шилдэг үзүүлбэрийн нэгдүгээр байр, “Amka dance” сургалтын төвийн багш Э.Амаржаргал "Бугуйт биелгээ" бүжгээр алтан медаль, шилдэг үзүүлбэрийн дэд байр, мөн бүжигчин Р.Наранцэнгэл "Үлэмж гоо" бүжгээр алтан медаль, шилдэг үзүүлбэрийн гуравдугаар байрт шалгарсан билээ.

Түүнчлэн Канад улсад 2022 оны арванхоёрдугаар сарын 30-31-нд цахимаар зохион байгуулсан Олон улсын бүжгийн наадамд “Amka dance” сургалтын төвийн багш Э.Амаржаргал нэгдүгээр байр, Бразил улсад өнгөрсөн сард цахимаар зохион байгуулсан олон улсын бүжгийн наадмын ардын гоцлол бүжгийн бага насны төрөлд Р.Наранцэнгэл нэгдүгээр байр, ардын бүжгийн бага насны хамтлаг бүжгийн төрөлд “Донж-2” хамтлаг тэргүүн байрт оржээ.