Жил бүрийн зуны сүүл сарын шинийн дөрвөнд Бурхан багшийн анхлан “Номын хүрдээ эргүүлсэн” их дүйчэн өдөр тохиодог билээ. Тэгвэл 2014.07.31-ний энэ өдрөөр “Ном дор итгэмүү, Ном дор мөргөмүү” эрдэм соёлын үйл ажиллагааг зохион байгуулж байна.

Үүнд:   
-  Монгол улсын эрдэнэсийн санд хадгалагдаж байгаа Дэлхийн соёлын өвд бүртгэлтэй монголчуудын бүтээсэн дэлхийд цор ганц, хосгүй үнэт “Есөн эрдэнийн Ганжуур”, мөнгөн хуудаст, алтан үсэгт “Сандуйн жүд” зэрэг судруудын үзэсгэлэнг Монголын Үндэсний Номын Санд олон нийтэд үнэ төлбөргүй үзүүлнэ.

- МБШТөв Гандантэгчэнлин хийдэд хадгалагдан буй хосгүй үнэт “Алтан Ганжуур”, Монголын Үндэсний Номын Санд хадгалагдан буй “Сандуйн жүд” бусад сүм хийдэд хадгалагдан байгаа “Доржзодов”, “Алтгангэрэл” тэргүүтэн судруудын дээжийг Тусгаар тогтнолын талбайд 10:00 -14:00 цагт хүндэтгэлтэйгээр залж, тус судруудын агуулгыг таниулан, үндэснийхээ үнэлэгдэшгүй өв соёлоор бахархах, дээдлэх сэтгэлгээг нийгэмд мэдүүлэхийг зорьсон болно.
    
Монголын уламжлалт соёлын хосгүй үнэт өвийг түмэн олондоо, ялангуяа залуу хойч үедээ сурталчилан таниулах, эх орон, ард түмнийхээ ирээдүйн амар амгаланг номын ёсоор төвшитгөхийг зорьсон бидний үйл ажиллагаанд нэгдэн ЭНЭХҮҮ мэдээллийг мэдээний цагтаа оруулж өгч олон нийтэд мэдээлэл хүргэхэд мэдээллийн ивээн тэтгэгчээр хамтран ажиллахыг хичээнгүйлэн хүсч байна.

Бурхан багшийн айлдвар “Ганжуур”, “Сандуйн жүд”, “Алтангэрэл” судруудыг хүндэтгэн дээдэлсний буянаар, өглөгийн эзэн таны болон та бүгдийн нас, буян арвидаж, барцад саад нь амирлаад, санасан хэрэг нь сэтгэлчлэн бүтэхийн өлзийтэй ерөөлийг өргөн дэвшүүлье.