Орхон аймгийн ЗДТГ-ын Нийгмийн бодлогын хэлтсээс санаачлан “Иргэн бүр зүрхээ хайрлая” сарын аяны хүрээнд ажиллагсдынхаа эрүүл мэндийг дэмжиж, аяны үйл ажиллагааг үр дүнтэй хэрэгжүүлсэн шилдэг байгууллага, хамт олныг шалгаруулах болзолт уралдааныг зарлалаа.

2022 оны байдлаар Орхон аймагт зүрх судасны тогтолцооны өвчлөл нь хүн амын дундах тэргүүлэх таван өвчний дөрөвдүгээрт, нийт бас баралтын тэргүүлэх шалтгаан болж байгаа юм. Энэ оны эхний есөн сарын байдлаар тус аймагт 352 нас баралт бүртгэгджээ. Тиймээс аймгийн ЗДТГ-ын Нийгмийн бодлогын хэлтсээс санаачлан “Иргэн бүр зүрхээ хайрлая” сарын аяныг өчигдрөөс эхлүүллээ. 

Аяны хүрээнд орон нутагт үйл ажиллагаа явуулж байгаа төрийн болон хувийн хэвшлийн 66 байгууллагын хөдөлмөрийн аюулгүй байдал, эрүүл ахуй хариуцсан инженер, ажилтнуудад эрсдэлт хүчин зүйлээс хэрхэн урьдчилан сэргийлэх, эрүүл зөв дадал хэвшлийг хэрхэн өдөр тутамд мөрдөх вэ гэхчлэн зөвлөгөө, мэдээлэл өгөх сургалтыг ажлын байранд нь зохион байгууллаа.

Эдгээр байгууллагын дунд аяны хүрээнд ажлын байранд ажиллагсдынхаа эрүүл мэндийг дэмжиж, эрүүл зүрх аяны үйл ажиллагааг үр дүнтэй хэрэгжүүлсэн байдлыг үнэлж шилдэг байгууллага, хамт олон шалгаруулах юм.