Канад улс цагаачлалын луйврыг таслан зогсоох зорилгоор гадаад оюутнуудын элсэлтийн хяналтыг чангатгана. Тодруулбал, гадаад оюутнуудын тус улсад суралцах элсэлтийн захидлыг хатуу хянана гэдгээ мэдэгдлээ. 

Цагаачлалын сайд Марк Миллер энэ талаар баасан гарагт мэдээлэхдээ “Канад улсад ажиллах зөвшөөрөл авахад харьцангуй хялбар байдаг учраас олон улсын оюутнуудын ирдэг нэг гол газар. Гэхдээ оюутны цагаачлалын тогтолцоо нь луйвар ихтэй” гэж ярьсан байна.

Түүний мэдээлснээр энэ оны 12 дугаар сараас эхлэн дунд боловсролын дараах боловсролын байгууллагууд өргөдөл гаргагчийг хүлээн авах захидлыг Канадын Цагаачлалын албаар шууд баталгаажуулах шаардлагатай болж байна.

Мөн тус улс 2024 оны намар "Хүлээн зөвшөөрөгдсөн байгууллагууд"-ын тогтолцоог хэрэгжүүлэхээр төлөвлөж байна.

Ингэснээр гадаадын оюутнуудад илүү сайн үйлчилгээ, орон сууц болон бусад дэмжлэг өгдөг байгууллагуудыг зарлах юм байна.

Канад улс эдийн засгаа хөдөлгөж, хүн амын насжилтын асуудлыг шийдвэрлэхийн тулд цагаачлалыг дэмждэг. Тус улсын Ерөнхий сайд Жастин Трюдо жил бүр цагаачлалын тоог нэмэгдүүлсээр байна.

Албан ёсны мэдээллээр 2022 онд Канадад идэвхтэй визтэй 800.000 гаруй гадаад оюутан байсан бол 2023 онд 900.000 орчим оюутан ирэх төлөвтэй байна.