Монголын Оюутны холбооноос энэ хичээлийн жилд “Ардын элч, эрдмийн эзэд” хөтөлбөр хэрэгжүүлэхээр болжээ. Жил бүр 28-30 мянган оюутан их, дээд сургууль төгсдөг бол үүний ердөө 34 хувь нь л мэргэжлээрээ ажилладаг гэх албан баримт бий. Энэ нь нэг талаараа хөдөлмөрийн зах зээлийн эрэлттэй мэргэжлийг сайн судлаагүйгээс үүсдэг гэх боловч нөгөө талаараа ажил олгогчдын шаардлага хэт өндөр байдгаас шалтгаалдаг аж. Тус хөтөлбөрийн талаар МОХ-ны Хэвлэл мэдээлэл, олон нийттэй харилцах хэлтсийн дарга Э.Батжаргал “Сайн дурын үйл ажиллагааны үндсэн дээр ирэх сарын 1-нээс их, дээд сургууль төгссөн, ажилгүй 100 залууг бүртгэж, орон нутгийн байгууллагад ажиллуулах юм. Гэхдээ эдгээр залууст цалин өгөлгүй, амьдрах байр, хоол зэргийг нь тухайн сум хариуцан ажиллахаар болж байна. Харин ажил хийсэн залуусыг цаашид мэргэжлээ дээшлүүлэн суралцахад тодорхой хэмжээний хөнгөлөлт, урамшуулалд хамруулна. Мөн өөр байгууллагад ажилд ороход нь давуу тал болох юм” гэлээ.