Их, дээд сургуульд суралцаж буй оюутнуудад эрүүл мэндийн тусламж, үйлчилгээ үзүүлэх оюутны эмнэлэг энэ сарын сүүлчээр Оюутны хотхонд нээгдэнэ. Тодруулбал, өнгөрсөн хичээлийн жилд ашиглалтад орсон мянган оюутны байр буюу “Оюутны өргөө”-гийн I корпусын нэгдүгээр давхарт тус эмнэлэг үйл ажиллагаа явуулах аж. Тус эмнэлгээс оюутнууд анхан шатны тусламж үйлчилгээ авч, өвчний магадлагаа авч, шинжилгээ хийлгэх боломж бүрдэх юм. Оюутнууд эмнэлэгт үзүүлэхээр очихдоо даатгалын дэвтэр, оюутны болоод иргэний үнэмлэхээ авч ирэх шаардлагатай аж. Энэ талаар МОХ-ны дэд Ерөнхийлөгч Д.Батчулуун “Оюутнуудад зориулсан эмнэлэг нь тэдэнд анхан шатны үзлэг оношлогоог хийнэ. Өөрөөр хэлбэл, өрхийн эмнэлгийн үүргийг биелүүлнэ гэсэн үг. Тухайн оюутан энэхүү эмнэлэгт хандаж, үзлэг оношлогоо хийлгэсний дараа шаардлагатай бол дараа дараачийн шатлалд эмчлүүлэх чиглэлийг тус эмнэлэг өгөх юм. Эмнэлгийн нээлтийг энэ сарын 25-нд хийхээр төлөвлөөд байна. Тоног төхөөрөмжийг ДЭМБ болон НҮБ-ын хүн амын сангийн тусламжтайгаар суурилуулна. Харин эмч, сувилагчдыг Нийслэлийн эрүүл мэндийн газраас томилохоор болсон” гэлээ.