Нийслэлийн таван байршилд гэр бүлийн зориулалтаар газар өмчлөхөөр болсон иргэдийн өргөдлийг өнгөрөгч сарын сүүлээр баталгаажуулж дууссан билээ. Гэсэн хэдий ч газар өмчлөх өргөдлөө баталгаажуулаагүй 4500 орчим иргэн байгаа талаар албаныхан мэдээлсэн. Үүнтэй холбогдуулан Нийслэлийн Засаг дарга бөгөөд Улаанбаатар хотын захирагч Э.Бат-Үүл өргөдлөө баталгаажуулаагүй иргэдэд боломж олгож,  энэ сарын 3-11-ний өдрүүдэд тэдгээр иргэдэд өргөдлөө баталгаажуулах хугацаа олгохыг холбогдох албаныханд даалгажээ. Газар өмчлөл, өмчийн менежментийн хэлтсийн дарга Т.Соёлхүү “Долоо хоногийн дараа өргөдөл хүлээн авах ажлыг зогсоогоод, сонгогдсон эрхийг нь цуцлах болно. Учир нь эдгээр иргэн газар өмчлөх эрхээ аваагүй зөвхөн цахим хэлбэрээр сонгогдчихсон байгаа. Харин эрхээ авна гэдэг нь Нийслэлийн Засаг дарга газар өмчлүүлэх захирамжаа гаргасан нөхцөлд газар өмчлөх эрхээ авсан гэж ойлгож болно. Хэрэв сунгасан хугацаанд тухайн иргэн өргөдлөө өгөөгүй бол цахим бүртгэлд хамрагдсан иргэдийн дунд дахин сонгон шалгаруулалт явуулж газар өмчлөгчийг тодруулна. Өөрөөр хэлбэл, газар өмчлөх иргэдийг цахим түүврийн аргаар дахин сонгох юм” гэв.