Монгол Улсын Ерөнхийлөгчийн ивээл дор Цагдаагийн ерөнхий газар, Монголын пауэрлифтингийн нэгдсэн холбоо хамтран зохион байгуулсан төрийн цэргийн болон хууль сахиулах байгууллагуудын "Классик пауэрлифтинг"-ийн аварга шалгаруулах тэмцээн өндөрлөж аваргуудаа шалгарууллаа.

“Аврагч” спорт хороонд хоёр өдрийн турш үргэлжлэн зохион байгуулагдсан энэхүү тэмцээнд тусгайлсан чиг үүрэг бүхий 16 байгууллагын 190 гаруй тамирчин 4 ангилалд 252 багц медалийн төлөө хүч чадлаа сорин өрсөлдсөн юм. Тэмцээнд Онцгой байдлын ерөнхий газрын 13 тамирчин оролцож алтан медаль 4, мөнгөн медаль 5, хүрэл медаль 6 удаа нийт 15 медаль хүртэж, байгууллагын дүнгээр дөрөвдүгээр байрт шалгарчээ.

Тодруулбал, мастер-1 ангиллын -105кг-ын жинд “Аврагч” спорт хорооны тамирчин, дэд ахлагч Г.Цэнгэл суултын төрөлд алт, таталтын төрлөөр мөнгө, шахалтын төрөлд мөнгө, нийлбэр дүнгээр мөнгөн медаль, мастер-1 ангиллын -93кг-ын жинд таталтын төрөлд ГТУА-36 дугаар ангийн салааны захирагчийн туслах, ахлах ахлагч Б.Даваасүрэн алтан медаль, ГТУА-68 дугаар ангийн аврагч, гал сөнөөгч, ахлагч Н.Хүрэлтулга таталтын төрөлд хүрэл медаль, мастер-1 ангиллын -120 кг-ын жинд шахалтын төрөлд “Аврагч” спорт хорооны дасгалжуулагч хошууч А.Алтанхуяг цээжнээс шахалтын төрөлд мөнгө, таталтын төрлөөр хүрэл нийлбэр дүнгээр хүрэл медаль, насанд хүрэгчдийн - 105 кг жингийн суултын төрөлд ахлах дэслэгч “Аврагч” спорт хорооны тамирчин Б.Батзангиа алт, таталтын төрөлд хүрэл, шахалтын төрлөөр хүрэл, нийлбэр дүнгээр алтан медаль, -120 жинд Б.Бат-Эрдэнэ таталтын төрөлд мөнгөн медаль хүртсэн байна.