Монголын үндэсний олон нийтийн радиогийн хоёрдугаар сувгаас “40 нас радио клуб ток шоу” шинэ нэвтрүүлгийг сонсогчдодоо хүргэх гэж байна. Энэ талаар МҮОНР-ийн хоёрдугаар сувгийн редактор, сэтгүүлч Г.Болороос тодрууллаа.

-Хүний амьдралын насыг залуу, дунд, өтөл нас гэж гурав хувааж болох юм шиг санагдсан.  Дунд нас гэдэгт бидний яриад байгаа 40 насыг тооцож болмоор. Энэ л насандаа хүн илүү ухаажиж, бие физиологийн хувьд ч тэгширдэг юм шиг санагддаг. Ер нь 40 нас бол өнгөрсөн, ирээдүйн тууль юм уу даа. Нэвтрүүлгийн нэр “40 нас” гэж байгаа болохоор зөвхөн энэ насныхны тухай яриа байж болохгүй юм байна гэж ярилцаад залуусын радио Р3-тай хамтрах нь зөв гэж шийдсэн. Мэргэжлийн сэтгэлзүйчдийн баг бидэнтэй хамтарна. Олон нийтийг хамарсан, зорилтот бүлэгтээ хүрч чадсан нэвтрүүлэг байж чадах болов уу гэж найдаж байна. Олон нийтийн цахим хуудас “Фэйсбүүк”-т ''40 нас радио клуб'' ток шоу гэсэн нэртэй групп хаяг нээсэн байгаа. Та бүхэн энэ хуудсанд нэгдэж, санаа бодлоо илэрхийлж болно. 10 дугаар сарын 10-ны Баасан гарагийн 17:05 цагаас МҮОНР-ийн Нэг, Хоёр, Гуравдугаар суваг буюу Р3 радиогоор нэгэн зэрэг сонсогчдодоо шууд хүрнэ. Та бүхэн манай нэвтрүүлгийг тухлан сонсож, санаа бодлоо чөлөөтэй илэрхийлээрэй. Бид таны сэтгэлээ нээж, бодлоо хуваалцах итгэлт анд,  амьдралыг эргэцүүлж, шинэ санаа шинэ эрч хүч авах талбар тань байх болно.