Үндэсний телевиз
Цагийн хүрд
Найм арваннэг
БНХАУ 2007 онд нүүрсний импортын татвараа цуцласан цагаас хойш дотоодын нүүрсний томоохон компаниудын эдийн засгийн байдалд хүндээр нөлөөлөөд байсан. Дотоодын компаниудын зүгээс нүүрсний импортыг тэглэх талаарх шахалтыг өнгөрсөн хугацаанд Засгийн газартаа үзүүлсээр ирсэн билээ.
Тэгвэл тус улсын Санхүүгийн яамны зүгээс өчигдөр импортын нүүрсэнд 3-6 хувийн татвар ногдуулах болсноо мэдэгдсэн байна. Тодруулбал, коксжих нүүрснээс бусад төрлийн нүүрсний татвар зургаан хувь, коксжих нүүрс, антрацитад гурван хувийн татвар ногдуулах аж.
Энэ нь өнгөрсөн оны наймдугаар сард хүрэн нүүрсний импортод гурван хувийн татвар ногдуулж эхэлснээс хойших татварын бодлогын гэнэтийн өсөлт болж байна.
Нүүрсний татвараа ийн нэмэх болсон талаар холбогдох албаныхан энэ жилийн байдлаар Хятадын дотоодын компаниудын 70 хувь нь ашиггүй ажиллаж, талаас илүү нь ажилчдынхаа цалинг хугацаандаа тавьж чадахгүй байгаа болон тус улсын дотоодын нүүрсний үнэ сүүлийн долоон жилийн хугацаан дахь хамгийн доод үнэдээ хүрээд байгаатай холбон тайлбарлаж байгаа аж.
Мөн тус улс агаарын бохирдлыг бууруулах хүрээнд ирэх оноос эхлэн хүхэр, үнслэг ихтэй нүүрсний импортод хориг тавих шийдвэр гаргаад байгаа. Энэ нь Австралийн нүүрс экспортлогчдод маш хүндээр тусч, Индонезийн хямд нүүрс илүү эрэлттэй болох магадлалтай талаар шинжээчид дүгнэжээ.
Харин манай улсын хувьд урд хөрш рүү экспортолж буй нүүрсний ихэнх хувийг коксжих нүүрс эзэлдэг бөгөөд энэ төрлийн татвар 3 хувь болсон нь нүүрс олборлогчдод хүндээр тусах нь тодорхой юм.
Манай улс энэ онд 31.4 сая тонн нүүрс экспортлохоор төлөвлөж, улсын төсөвт суулгасан. Тэгвэл өнгөрсөн наймдугаар сарын үзүүлэлтээр 12.2 сая тонн нүүрс экспортлосон дүнтэй гарсан юм.
| Хятад улс импортын нүүрсний татвараа 3-6 хувь болгон өсгөлөө | ||
| Үзсэн: 2833 | Mongolian National Broadcaster |
М.Золзаяа
Б.Цоожчулуунцэцэг
Р.Слава
Сэтгэгдэл бичих:
АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.