Өчигдөр шөнө Сүхбаатар аймгийн Сүхбаатар сумын "Шинэ булаг" багийн нутагт хээрийн том хэмжээний түймэр гарсан бөгөөд үүнийг аймгийн Онцгой байдлын газрын албан хаагчид бүрэн унтраажээ. “Шинэ булаг” багийн даргын өчигдөр шөнийн мэдээгээр түймэрт өртөх магадлалтай бүсэд нийт 130 гаруй айл өрх амьдардаг бөгөөд одоогийн байдлаар хоёр айлын хадлангийн талбай түймэрт автаж бусад айл өрхүүд аюултай байдалд ороод байгаа аж. Гэр бүл, амь насаа аврах гэсэн нутгийн иргэд дээл хувцас, байгаа бүхнээрээ түймрийг цохиж унтрааж байсан гэнэ. Энэ талаар тус аймгийн Онцгой байдлын газрын байцаагч н.Батгэрэл “Сүхбаатар сумын нутагт гарсан хээрийн түймрийг бүрэн унтрааж дуусаад, цурмыг сумын Онцгой байдлын хэлтэст хүлээлгэж өгсөн байгаа. Гарз хохирлын хувьд одоохондоо тогтоогдоогүй байна. Ер нь орон нутгаар зорчиж буй иргэдэд анхааруулахад татсан тамхиныхаа цогийг унтраалгүй хаяхгүй байх, хуурайшилттай энэ үед ил гал түлэхгүй байхыг онцгойлон анхааруулъя” гэлээ.