Цөлжилттэй тэмцэх тухай НҮБ-ын конвенцын талуудын 17 дугаар бага хурлын хүрээнд Далайд гарцгүй хөгжиж буй орнуудын (LLDCs) Байгаль орчны сайд нарын уулзалт боллоо.

Уулзалтаар газрын доройтол, цөлжилт, гангийн сөрөг нөлөөг бууруулах, хуурайшилтад тэсвэртэй байдлыг нэмэгдүүлэх, байгальд суурилсан шийдлийг хэрэгжүүлэх, газар-усны нэгдсэн менежмент болон олон улсын санхүүжилтийг нэмэгдүүлэх асуудлыг хэлэлцэж буй юм.

Уг уулзалтыг нээж БОУАӨ-ийн дэд сайд Б.Мөнхтамир Монголын туршлага, тэр дундаа бэлчээрийн тогтвортой менежмент, газрын доройтлыг бууруулах, байгальд суурилсан шийдэл болон “Тал хээрийн төлөвлөгөө”-ний хүрээнд хэрэгжүүлж буй санаачилгуудыг танилцууллаа.

Дэлхийн хүн амын ердөө 7 хувийг бүрдүүлдэг далайд гарцгүй хөгжиж буй 32 орон дэлхийн нийт газар нутгийн 12 хувийг эзэлдэг боловч 2012-2023 онд бүртгэгдсэн ган, хөрсний гулгалтын 20 гаруй хувьд өртсөн байна.

Мөн далайд гарцгүй хөгжиж буй орнуудын газар нутгийн талаас илүү хувь нь хуурай бүсэд хамаардаг.

Тиймээс эдгээр улс орнууд хамтын ажиллагаагаа бэхжүүлж, газрын доройтол, усны хомсдол, уур амьсгалын өөрчлөлтөд тэсвэртэй хөгжлийг дэмжих олон улсын хамтын ажиллагаа, санхүүжилтийг нэмэгдүүлэхээр байр сууриа нэгтгэж байна гэж Байгаль орчин, уур амьсгалын өөрчлөлтийн яамнаас мэдээллээ.