Мэргэжлийн хяналтын газар Нийслэлийн Өмчийн харилцааны газрын үйл ажиллагааг шалгажээ. Уг шалгалтыг түүврийн аргаар явуулсан ч багагүй зөрчил илэрсэн байна. Шалгалтаар Өмчийн харилцааны газрын дотоод хяналт тааруу, хотын ерөнхий төлөвлөгөөний дагуу дуудлага худалдаа, төсөл сонгон шалгаруулалтаар газар олгож хэвшээгүй, гэрчилгээний хугацаа сунгах, бусдад шилжүүлэх хүсэлт гаргасан хүний материалыг бүрэн аваагүй, хүсэлтийг хугацаанд нь шийдвэрлэдэггүй гэх мэт зөрчил илэрчээ.

Үүнээс гадна үйлдвэрлэл, үйлчилгээний зориулалтаар газар авсан иргэн, аж ахуйн нэгж, байгууллагатай гэрээ байгуулж, гэрчилгээ олгохдоо байгаль орчинд нөлөөлөх байдлын үнэлгээ хийлгэсэн эсэхийг харгалзахгүй, газрын мэдээллийн санд ямар хүн, ямар захирамж тушаал, захирамжийн дагуу бүртгэсэн нь тодорхойгүй зэрэг нийтлэг зөрчил илэрсэн байна. Эдгээрийг арилгуулахаар нийслэлийн Өмчийн харилцааны газар болон Сонгинохайрхан, Сүхбаатар, Багануур, Баянзүрх дүүргийн Өмч, газрын харилцааны албанд албан шаардлага өгчээ.