АНУ-ын “Gilead Sciences” компанийн элэгний С вирусыг эмчлэх “Sovaldi” (софосбувир) 400 мг шахмал эмийг Канад улсын “Patheon Inc” үйлдвэрт гэрээгээр үйлдвэрлүүлэн Монгол Улсад “Access” буюу “Хүртээмж” хөтөлбөрийн хүрээнд импортоор оруулж ирэх зорилгоор өнгөрөгч долоодугаар сарын 30-ны өдөр улсын бүртгэлд бүртгүүлэх хүсэлтийг яаманд ирүүлсэн байдаг. Харин “Sovaldi” эмийн бүртгэлийн материал нь холбогдох хууль тогтоомж, журмын зарим шаардлага хангаагүй тул тодруулах, сайтар судалж үзэх хэрэгтэй байгаа гэдгээр хойшлуулсан билээ. Түүнээс хойш нэлээд хэдэн сар өнгөрсөн ч одоог хүртэл энэ эм Монголд орж ирээгүй байна. Үүнтэй холбогдуулан ЭМЯ-ны дэд сайд Ж.Амарсанаа “АНУ-д үйлдвэрлэсэн Софосбувер гэдэг эмийг оруулж ирэх ажил удааширч байна. Хаана, хаанаа хүнд суртлын асуудал байгаад байх шиг. Миний хувьд бол үүнд бухимдалтай хандаж байгаа. Уул нь гэрлийн хурдаар биелэх ёстой ажил. Яагаад гэвэл ард түмний эрх ашиг хамгийн түрүүнд тавигдах учиртай. Эрүүл мэндийн яам бол Монгол Улсын хүн амын эрүүл мэндэд чухал хэрэгцээтэй гэснээ маш хурдан хэрэгжүүлэх чадвартай тийм статус байх ёстой. Гэтэл одоо энэ ажлыг эхлүүлснээс хойш 3-4 сар өнгөрч байхад шийдсэн юмгүй байгаа үнэхээр бухимдуулж байна. Гэхдээ удахгүй шийдэгдэх байх гэж найдаж байгаа” гэж ярилаа.

Тэрбээр 900 ам.долларын үнэтэй эмийг 1800 ам.долларын өртгөөр авах болсон тухайгаа өмнө нь хэвлэл мэдээллээр ярьж байсан билээ. Харин үүнтэй холбогдуулан өчигдөр Эрүүл мэндийн сайд Н.Удвал “Эмийг бүртгэх эсэхийг яам  хэлэлцээд  сайн судлах шаардлагатай гэж үзэн буцаасан. 900 долларын эмийг 1800 доллараар оруулж ирнэ гэсэн нь дэд сайд болоод “Оном” сан хоёрын хооронд маргаан үүсгээд байна. Энэ асуудлыг одоо хууль хяналтын байгууллага шалгаж байгаа. Би энэ асуудлаарх  дэлгэрэнгүй тайланг ҮАБЗ, ТЕГ-т хүргүүлсэн” гэх мэдээллийг хийлээ.

Энэ эмийг оруулж ирсэн тохиолдолд үйл ажиллагааг нь зохион байгуулах үүрэгтэй “Оном” сангийн захирал Ч.Ганхөлөг “Бидний хувьд улсдаа оруулж ирэх ажлыг зохион байгуулж байна. Харин зарж худалдаалах ажлыг тусдаа компани гүйцэтгэнэ.  Анхнаасаа энэ эмийг  900 ам.доллараар оруулж ирэхээр ярьсан. Дэд сайд Ж.Амарсанаа санаатай  юм уу, санамсаргүй юм уу 1800 доллар гэж ярьсан нь яах аргагүй буруу мэдээлэл. 900 ам.доллараар гурван сарын курс эмчилгээ хийнэ. ДЭМБ-аас 3 сарын курс эмчилгээгээр  элэгний С вирусыг бүрэн эмчлэх боломжтой гэж  үзсэн.  Гэхдээ өөр эмэнд дасал болчихсон өвчтөнд хавсарч хэрэглэвэл зургаан сарын курс эмчилгээ шаардагдана. Энэ өвчнөөр өвчилсөн хүн бүрт  зургаан сарын  курс эмчилгээ шаардлагагүй. Тэгэхээр 900 ам.доллар гэдгээрээ явах нь зөв. Үүнээс болоод маргаан үүссэн зүйл байхгүй. Бидний хувьд иймэрхүү хэрүүл, маргаанд оролцох сонирхол алга” гэлээ.