УИХ-ын Төрийн байгуулалтын байнгын хорооны өнөөдрийн /2014.11.05/ хуралдаанаар УИХ-ын гишүүн Д.Хаянхярваа нарын нэр бүхий 28 гишүүний өргөн барьсан Монгол Улсын Ерөнхий сайдыг огцруулах тухай саналыг хэлэлцсэн. Ингээд УИХ-ын нэр бүхий 28 гишүүнээс Ерөнхий сайдыг огцруулахаар өргөн барьсан саналыг дэмжье гэсэн саналын томьёоллоор санал хураалгахад Байнгын хорооны хуралдаанд оролцсон 17 гишүүний 11 нь буюу 64.7 хувь нь дэмжив. Уг асуудлыг УИХ-ын чуулганы өнөөдрийн үдээс өмнөх нэгдсэн хуралдаанаар хэлэлцэж нийт гишүүдийн 54.5 хувь буюу олонхийн саналаар Ерөнхий сайд Н.Алтанхуягийг огцруулах шийдвэр гаргалаа.  
Энд нэг зүйлийг тодотгоход, Төрийн байгуулалтын байнгын хорооны хуралдааны санал хураах явцад МАН-ын долоон гишүүн, АН-аас бүлгийн дарга Д.Эрдэнэбат, гишүүн Р.Бурмаа, “Шударга ёс” эвслээс  Г.Уянга нарын гишүүд Н.Алтанхуягийг огцруулах кноп /товчлуур/ дарсан. Ерөнхий сайдаа авч үлдэхээр гарын үсэг цуглуулж хүртэл “хүч гаргасан” АН-ын бүлгийнхэнд энэ нь том “цохилт” болсон юм.  
АН-ын бүлгийн дарга Д.Эрдэнэбат энэ шийдвэрээ "Техникийн саатлаас болсон. Би андуураад дарчихсан. Санал хураах техникийг нь сайн ойлголгүй андуурч дарсан гэсэн үг. Түүнээс би хэзээ ч, хаана ч Н.Алтанхуягийг дэмжих хүн. Хэрэв би албаар эсрэг санал өгсөн бол намын дүрмээр намайг буулгаж, хөөж зайлуулж болно. Харин андуурал гарсан гэдгийг энд онцлох ёстой” гэж тайлбарласан. 
Хамгийн хариуцлагатай байх мөчид АН-ын бүлгийн дарга ийн мунгинасан нь санаатай, эсвэл санаандгүй гэдгийг батлах хүн түүнээс өөр байхгүй. Гэхдээ л энэ үйлдлээс нь биднийг төлөөлөн УИХ-д суугаа гишүүд маань учраа олохгүй кноп дардаг байж болзошгүй гэсэн хардалт төрж байгааг нуух юун. Өнөөдрийн жишээн дээр л гэхэд АН-ын бүлгийн даргын андуурлаас болоод Засаг унаж байх жишээний. 
Харин УИХ-ын чуулганы өнөөдрийн үдээс өмнөх нэгдсэн хуралдааны үеэр Монгол Улсын Ерөнхий сайдыг огцруулах тухай санал хураахад АН-ын бүлгийн дарга Д.Эрдэнэбат татгалзсан хариулт өгсөн харагдана билээ. Гэсэн ч түүний өгсөн өмнөх санал Ерөнхий сайдыг түлхэн унагаахад түлхэц болсон нь тодорхой юм.  
Гишүүд үүрэглэж суугаад цочихдоо, эсвэл асуудлыг ерөөсөө ч ойлгоогүй мөртлөө кноп дарж, дээр өгүүлсэнчлэн андуурч товчлуур дараад байдаг бол ямар хэцүү вэ. Зөвшөөрсөн, татгалзсан аль ч кнопыг дарлаа гэсэн үр дагавар нь энэ улсад бүр наашлуулж бодвол монголчуудын ахуй амьдралд нөлөөлнө шүү дээ. Тэгэхээр УИХ-ын гишүүдэд нэн тэргүүнд товчлуур дарах хичээл заалгах хэрэгтэй юм байна. Ингэхгүй бол улс орны “аминд тулсан” чухлаас чухал асуудлууд дээр тэд андуурч эндүүрч товчлуур дарсаар л байж мэдэх юм. Эсвэл андуурчихлаа гэдэг нь гишүүдийн арьсаа хамгаалах бас нэг тактик юм болов уу. Арай ч ийм зүйлээр улс төр хийж өөрийгөө “тэнэг” болгож харагдуулах хүн баймааргүйсэн.