Харин тэднийг ирснээс хойш байдал огт өөр боллоо. Ихэнх ээжүүд хүүхдээ дуудаж авчраад хажуудаа суулгачихлаа. Зарим нэг нь тэр бяцхан амьтдыг муухай харан зэвүүцэж байх юм. Эгч нь нэг охинтой дүүжин дээр тоглохыг хүссэн ч цаадах нь заваан хүүхэд гэж хэлчихээд явчихав. Хүүхэд хүртэл нэгнийгээ ингэж гадуурхах нь харамсалтай. Магадгүй би ч хүүгээ тийм хүүхэдтэй тогловол эвгүйцэхгүй байна гэдэгтээ тийм ч итгэлтэй бус. Үүндээ өөртөө ч гэмших шиг.  Гэхдээ л тэд чинь хүүхэд шүү дээ. Тэдэнд ямарч буруу байхгүй. Хиртэй хувцас, хэлд бүрэн орж амжаагүй тультраа хэлнээс нь унах хараалын үгс. Энэ бүхэн арчаагүй эцэг эхээс болдог. Цаас шиг цэвэрхэн тэдний дэргэд архидан согтуурч, биесээ элдвээр дуудан танхайрч, учир үл мэдэх тэднийг элдэвлэн харааж загнаж,өлөн ходоодтой өдөржин байлгаж, бусдын идэж байгаа зүйл рүү өлбөлзүүлэн тамлаж...        зүрх шимширмээр.

Өнөөдөр тэд тоглоомын талбай дээр гадуурхагдаж байгаа бол ирээдүйд амьдралд гадуурхагдна. Нөгөөтэйгүүр хорвоогийн эрээн барааныг ялгаж таниагүй байгаа, бараан бүхнийг тодхон гэгээхнээр хардаг бяцхан үрсдээ ялгаварлан гадуурхах муухай үзлийг юм юмны түрүүнд суулгаж өгч байгаа эцэг эхүүдийн өмнөөс даанч харамсмаар.  Би хүүхдэд хайртай, маш их хайртай. Боломжтой бол би тэдний төлөө олон ч зүйл хийхсэн гэж хүсдэг. Тиймээ, би өнөөдөр байрны урьдчилгаа цуглуулах гээд хадмындаа амьдарч байгаа хүн. Гэхдээ би ирээдүйд олон мянган хүүхдийн ирээдүйг аврах том асрамжийн төвтэй болохыг хүсдэг. Сургууль цэцэрлэг бүгдийг нэг дор шийдсэн. Бяцхан хотхон барина даа гэж мөрөөддөг. Энэ мөрөөдлөө би зорилгоо болгосон. Хэтэрхий мөрөөдсөн амьтан байна гэж зарим нь бодож магадгүй ээ.

Гэхдээ л би гудманд хаягдсан эцэг эхдээ гологдсон бяцхан амьтдын тухай энд тэндээс олж уншаад сэтгэлээ зовоож суухын оронд тэдэнд тусалмаар байна. Надтай зэрэгцэж төрсөн бүсгүй 2 хоногтой хүүхдээ эмнэлэгт хаяад явчихсан байсан. Тэр бяцхан амьтныг би эмнэлгээс гартлаа 2 хоног хөхүүлсэн. Ам нь өмөлзөөд шуналтай гэгч нь сорж байгаа тэр хүүгийн төрх одоо ч нүдэнд минь харагдаад хэцүү байдаг. Болдог бол тэр хүүг эмнэлгээс аваад гармаар л байсан. Гэвч миний амьдрал ямар билээ, би ч гэсэн түүнд бүхнийг өгсөн сайхан амьдралыг амлаж чадахгүй шүү дээ. Хөөрхийг хүүхдийн сувилалд аваад явсан. Бодож мөрөөдөж байгаа шигээ ихийг яг одоо тэдэнд өгч чадахгүй ч өгөхийн төлөө мэрийх болно. Би эх хүн, та ч гэсэн эцэг эх хүн эсвэл ирээдүйд эцэг эх болно.  Хүүхэд бол хүүхэд шүү дээ. Тэдэнд сэтгэлээсээ туслаж байя хүмүүсээ. Гудманд таарсан ч ганц зайрмагны мөнгө өглөө гээд бид хоосорчихгүй шүү дээ. Хааяа ч гэсэн цалингаасаа багахан ч болов мөнгө сайн үйлсэд зориулж байгаарай.

Та бүхэнд баярлалаа. Монголын үрс маш олон болтугай…

эх сурвалж: www.cekc.mn