Санхүүгийн зохицуулах хороо санхүүгийн үйл ажиллагаа явуулж буй байгууллагууд, мэргэжлийн холбоод болон олон улсын байгууллага, төрийн байгуулагуудын төлөөллийг оролцуулсан нэгдсэн чуулга уулзалтыг энэ сарын 20-ны өдөр зохион байгуулахаар болжээ. Чуулга уулзалтын зорилго нь салбарын өнөөгийн байдал, цаашдын зорилт, хяналт зохицуулалт, хөрөнгө оруулагч, харилцагчдын эрх ашгийг хамгаалах, тэдний боловсролыг дээшлүүлэх талаар болон салбарын хүрээнд тулгамдаж буй асуудлууд, тэдгээрийг шийдвэрлэх арга замын талаар хэлэлцэж нэгдсэн зөвлөмж гаргах аж. Энэхүү чуулга уулзалт нь салбаруудын  бүтээгдэхүүн, үйлчилгээний  уялдааг хангах, санхүүгийн үйлчилгээний хүртээмжийг нэмэгдүүлэх, банкнаас бусад санхүүгийн салбарын өсөлтийг хангах, төрийн болоод төрийн бус байгууллагуудын харилцаа холбоог бэхжүүлэхэд чухал ач холбогдол өгнө гэж  салбарынхан үзжээ.